Шчасце нараджаецца ў сям’і
Прыемная падзея на днях здарылася ў жыцці дзвюх шматдзетных матуль: жыхаркам аграгарадка Дрычын і вёскі Забалацце Вользе Квач і Святлане Дубовік адпаведна старшыня райвыканкама Канстанцін Жыгуцкі ва ўрачыстых абставінах уручыў ордэн Маці.
У сям’і Вольгі Сяргееўны выхоўваецца пяцёра дзяцей: чатыры хлопчыкі і адна дзяўчынка. Старэйшаму сыну 8 гадоў, а самаму малодшаму — 1 год 7 месяцаў.
— Узнагарода стала для мяне нечаканасцю, — усміхаецца жанчына. — Ці можна адзначаць за тое, што прызначана нам ад прыроды? Аднак радасці ад атрымання ордэна было шмат.
Універсітэт мацярынства пяць разоў прайшла і Святлана Дубовік. Старэйшаму сыну сёлета споўнілася 11 гадоў, а малодшаму зараз паўтара.
— Якія пачуцці выклікала ўзнагарода? — Святлана Мікалаеўна на імгненне задумваецца. — Безумоўна, радасць. Не толькі за сябе, а і за тое, што такому важнаму аспекту жыцця, як нараджэнне дзяцей, дзяржава надае значную ўвагу, а значыць, за будучыню маладога пакалення можна не хвалявацца.