На экспазіцыі выставы прадстаўлены як традыцыйныя народныя рамёствы беларусаў, так і новыя сучасныя тэхнікі. Да першых можна аднесці вырабы з саломы Святланы Пацкевіч і Алены Зінавенка, сярод якіх ёсць і аб’ёмныя павучкі, і прыгожыя аплікацыі. Работы з бяросты Святланы Дубінінай можна лічыць эксклюзіўнымі ў нашым раёне, бо з гэтым матэрыялам зараз амаль ніхто не працуе.

Можна тут убачыць тканыя і вышываныя ручнікі Вольгі Наўдзюнас, ажурныя карункі патомнай майстрыхі Наталлі Астаповіч, драўляны посуд Мікалая Шмаргілава. Нікога не пакінуць раўнадушным валяныя лялькі Валянціны Прасаловіч, а з кашамі Таццяны Шунькінай можна адпраўляцца па грыбы ці ягады. Цудоўныя вырабы з дрэва прадаставіў на выставе малады майстар Сцяпан Жук. Дэманструюцца і вязаныя вырабы Вольгі Герасімовіч, Ірыны Пацкевіч.

А Ірына Вараб’ёва прадаставіла на выставу як вырабы, выкананыя ў тэхніцы пэчворк, такія як коўдры, падушкі, так і мякканабіўныя цацкі. У трэндзе — распісныя навагоднія боцікі для падарункаў, а таксама сувенірныя зайцы. Майстрыха і сама наведала выставу, каб пазнаёміцца з творчасцю калег. Расказала, што ў Беларусі жыве дзесяць гадоў, прыехала сюды з  Украіны. На вяселле ёй падарылі швейную машыну, з гэтага і пачалася творчая дзейнасць. Стала эксперыментаваць, і даволі паспяхова. Навучылася шыць коўдры, пакрывалы. Асвоіла скрапбукінг, вырабляе фотаальбомы. Цяпер падарункі не трэба шукаць у магазінах, бо можна зрабіць іх самастойна, адрасна, з душой. Напрыклад, вокладкі на пашпарты, альбомы, падушкі “інь-янь”, вязаныя кручком занавескі. Да навагодняга свята адных толькі зайцаў з паўсотні выпусціла ў свет, зрабіла нямала спаднічак для ялінкі. Рукадзельніца працуе ў Дэпартаменце аховы, а творчасць для яе — лепшы адпачынак.

Сапраўдным геймдызайнерам можна назваць Алега Сямёнава. У дзейнасці, да якой ён шырока далучае дзяцей, майстар спалучае традыцыйныя для беларусаў тэхнікі апрацоўкі дрэва з сучаснымі настольнымі гульнямі, цікавымі для юнага пакалення. Дзеці могуць і самі прыдумваць умовы, па якіх можна будзе гуляць. І чым аператыўней зробіш, тым хутчэй можна будзе пачаць спаборніцтва. Сюжэты для гульняў розныя: ад знаёмых кожнаму пятнашак і крыжыкаў-нолікаў да розных галаваломак, якія трэба складаць па пэўным алгарытме. Ёсць сярод серыйных гульняў “сырная горка”, а ў разработцы зараз знаходзіцца “рыбалка”, дзе сапернікі змогуць не толькі драўлянымі вудамі вылоўліваць з палонак імправізаванага вадаёма рыб, але і падлічваць сумарны ўлоў. Такі варыянт гульні прыдумаў сам майстар. Дарэчы, працуе ён у дзіцячай мастацкай школе і Ясенскай СШ.

Яго вучні не раз удзельнічалі ў міжнародных і рэспубліканскіх конкурсах і прывозілі адтуль узнагароды. Прычым справай гэтай захапляюцца як хлопчыкі, так і дзяўчынкі. Канстанцін Ластавы, Глеб Кур’яновіч, Арына Пацкевіч, Аляксандра Клёнава, Ганна Ліневіч і іншыя рабяты без цяжкасці могуць вырабіць сувенір сваімі рукамі. Некаторыя іх работы таксама знайшлі сваё месца на выставе.

З творчасцю землякоў можна пазнаёміцца да 15 студзеня.