УКП ЖКГ закупіла дэкаратыўныя расліны, і работнікі ўчастка азелянення актыўна вядуць высадку іх на клумбы.

Усяго набыта 8 540 каліў кветак. Згодна з пададзенымі заяўкамі 4 530 з іх адпраўлена ў сельсаветы. Кветкі атрымалі і прыступілі да іх высадкі Ялізаўскі, Свіслацкі, Татаркаўскі, Ясеньскі, Дараганаўскі, Градзянскі, Лапіцкі сельсаветы. Астатнія расліны ўпрыгожаць райцэнтр.

Акцэнт сёлета зроблены на бегоніях, колеўсах, аксаміт­ках (тагецес), плюшчы, петуніях, сальвіях, астрах. Таксама расквецяць вуліцы віёла, традэсканцыя, дзіхондра, цынерарыя, шалфей, лабелія, сурфінія, хоста, хрызантэма. Асабліва маляўніча выглядаюць у вулічным ландшафце ампельныя культуры. Сёлета гэту групу будуць прадстаўляць пеларгонія, гваздзікі. Акрамя таго, зараз афармляецца закупка 760 руж — гэтыя кветкі ўпрыгожаць цэнтральную вуліцу райцэнтра.

У горадзе дэкаратыўнымі раслінамі засаджваюцца ўсе кветачніцы, вазы, а гэта 95 падвешаных на дарожнай агароджы, дзевяць трох’ярусных кветкавых канструкцый, па дзесяць вялікіх і малых ёмістасцей, чатыры малыя архітэк­турныя формы.

Штодзённы догляд за раслінамі ў горадзе будуць весці работнікі УКП ЖКГ, ім дапамагаюць выхаванцы школьных лагераў працы і адпачынку. Праполка клумб ужо пачалася.

Іна Заскевіч