Мінулы год для ААТ “ПМК № 95 “Вадбуд”, працаўнікі якога ў нядзелю адзначаць прафесійнае свята, быў досыць складаным. Прычыны такога раскладу самыя слушныя. У будаўнічай галіне нашай краіны пасля перыяду інтэнсіўных намаганняў (тут узгадаем нашу малую радзіму, дзе вялася напружаная работа па добраўпарадкаванні, рэканструкцыі шэрагу важных інфраструктурных аб’ектаў) надышоў чарговы час зацішша.

“Вадбуд” ва ўзгаданых справах удзельнічаў і да таго ж паспяхова спраўляўся з выкананнем заказаў па профільных дзяржпраграмах. Так што сёння каля 70% меліярацыйнай сістэмы Асіповіччыны даведзена прадпрыемствам да нармальнага рабочага стану. Работы ў гэтым кірунку летась працягваліся, аднак без падрадаў на іншыя аб’екты прадпрыемству было цяжка.

Так што скончылі сезон 2021 года нашы меліяратары з неўражваючымі фінансавымі вынікамі і не ў самым вясёлым настроі. Аднак разглядаць сітуацыю трэба ў кантэксце іншых гаспадарчых рэалій. А яны такія. У калектыве захаваліся ўсе высакакласныя спецыялісты, якія кіруюць спецтэхнікай (бульдозеры, экскаватары). На вакантныя месцы прыйшлі людзі, якія добра разумеюць свае магчымасці і ведаюць, што грошы ў “Вадбудзе” можна зарабляць. Канечне, калі працаваць належным чынам.

Па словах дырэктара прадпрыемства Івана Ганчарова, зараз ПМК № 95 сканцэнтравала ўсю тэхніку і работнікаў у наваколлі вёскі Ягаднае, дзе праводзіцца рэканструкцыя меліярацыйнай сістэмы. Пакуль гэта — прыярытэтны аб’ект. А яшчэ выдзелены сродкі на правядзенне тэхнічнага рамонту сажалак ААТ “Рыбгас “Свіслач” і павялічана фінансаванне работ на нагляд за меліярацыйнымі збудаваннямі на ўсёй тэрыторыі раёна.

Гэта мінімум неабходнага, каб прадпрыемства працавала рытмічна і мела запас часу для пошукаў падрадаў. Канкурэнцыя паміж будаўнічымі арганізацыямі, якія ўдзельнічаюць у тэндарах, застаецца вострай, аднак патэнцыял “Вадбуда” дазваляе не адчуваць сябе аўтсайдарам.

Ну а далей, як кажуць, дарогу пераадолее той, хто не стаіць на месцы.