Вясковы турызм у нашай краіне атрымаў даволі вялікае распаўсюджанне. Многія гараджане, абдумваючы, дзе правесці  водпуск або выхадныя, перавагу аддаюць менавіта аграэкасядзібам. Туды адпраўляюцца групы сяброў, каб адпачыць, а таксама працоўныя калектывы, якія жадаюць правесці карпаратыў.

У мінулым месяцы Прэзідэнт краіны выдаў Указ № 351 “Аб развіцці аграэкатурызму”, які за-клікаў выключыць магчымасць пад выглядам аграсядзіб весці рэстаранны ці гасцінічны бізнес, а таксама абараніць правы сусе-дзяў такіх “устаноў культуры”. Гэтаму і была прысвечана нарада, якая прайшла ў пятніцу пры ўдзеле першага намесніка старшыні райвыканкама Сяргея Ананіча пад началам намесніка старшыні райвыканкама Ганны Землянухінай. А запрошаны на мерапрыемства былі старшыні сельсаветаў і ўладальнікі аграсядзіб.

У раёне зарэгістравана і дзейнічае 21 аграэкасядзіба. Самыя запатрабаваныя сёння — “Краснае”, “Каменная горка”, “Зялёная дубрава”, “Ліхалапічы”, “Бермудскі трохвугольнік”, “Бацькоўская спадчына”.

Галоўны спецыяліст сектара спорту і турызму райвыканкама Вольга Емельянава расказала, якія змяненні ўносіць Указ Прэзі-дэнта ў існуючыя датуль правілы. Напрыклад, не ва ўсіх населеных пунктах зараз можна размясціць такія аб’екты, але гэта абмежаванне не датычыць Асіповіччыны, дзе забароненых месцаў пакуль няма. Галоўныя ж умовы стварэння названага турыстычнага аб’екта: наяўнасць дома з колькасцю пакояў да дзесяці, згода ўласніка на вядзенне такога роду бізнесу, прадастаўленне адпачываючым магчымасці азнаёміцца з аб’ектамі гісторыі населенага пункта, дзе яны бавяць час, і паўдзельнічаць у майстар-класах. Гасцям аграсядзіб павінны быць прапанаваны не менш за дзве паслугі (экскурсіі, творчыя майстэрні, мясцовыя  абрады і г.д.). Ну а тыя, у сваю чаргу, павінны выконваць правілы супрацьпажарнай бяспекі, прыродаахоўчыя, не парушаць нормы пражывання.

Спецыялісты аддзелаў райвыканкама і кіраўнікі розных служб адказалі на пытанні ўладальнікаў аграэкасядзіб. Напрыклад, адзін з гаспадароў цікавіўся, ці не закрыюць сядзібу, калі які нядобразычлівец паскардзіцца на шум за суседняй агароджай. Пыталіся гаспадары, каго лічыць суседзямі, ці будуць прымацца меры па добраўпарадкаванні прыбярэжнай паласы ракі Свіслач у аграгарадку Лапічы, ці плануецца рамонт дарогі ў аграгарадку Свіслач, уздымаліся і іншыя пытанні.

Прыйшоў час удасканаліць механізм дзейнасці ў сферы аграэкатурызму і паклапаціцца пра якасць аказваемых паслуг, каб аграсядзібы выконвалі сваю першапачатковую функцыю — знаёміць гасцей з гісторыяй раёна, яго знакамітымі выхадцамі, цікавымі месцамі і незвычайнымі  краявідамі.