Да добрага, як вядома, прывыкаюць хутка, так што калі на працягу некалькіх мінулых тыдняў заўважалася часовае змяненне колеру вады, адразу паступалі сігналы ў розныя інстанцыі. Каб даведацца, чаму адбываліся адхіленні ад нормы, рэдакцыя звярнулася ў арганізацыі, якія вядуць непасрэдны кантроль за якасцю пітной вады.

У райЦГЭ адзначылі, што па выніках лабараторных даследаванняў па мікрабіялагічных паказчыках узятыя ў лютым пробы адпавядалі гігіенічным нарматывам, па санітарна-хімічных у шэрагу месцаў зарэгістравана перавышэнне па ўтрыманні жалеза.

Раней у раёнцы паведамлялася, што пасля пачатку функцыянавання новай станцыі абезжалезвання яшчэ на працягу некалькіх месяцаў магчымы часовыя кропкавыя адхіленні якасці вады, а таму неабходна крыху пачакаць, калі сітуацыя стабілізуецца. У асноўнай жа большасці дамоў вада адпавядае нормам. Гэта пацвярджаюць і ў лабараторыі  ўчастка ВКГ філіяла “Бабруйск-водаканал”, якая штомесячна бярэ пробы ў 30 пунктах горада.

У лютым адзначалася раптоўнае пагаршэнне якасці вады на пасёлку Савецкім (у асноўным у доме № 21), адкуль у адрас “Бабруйскводаканала” паступалі звароты. Пасля правядзення пазачарговай прамыўкі сетак вада прыйшла ў норму. Камунальнікі растлумачылі, што Савецкі пасёлак мае ўласную свідравіну і вада сюды ідзе не са станцыі абезжалезвання. Сёлета запланавана падключэнне гэтага мікрараёна да Паўночнага водазабору, што дазволіць зняць праблему павышанага ўтрымання жалеза. Днямі жыхары некалькіх дамоў на вуліцы Чарняхоўскага таксама заўважылі, што вада не такая празрыстая, як звычайна. Начальнік гарадскога ўчастка водаправодна-камунальнай гаспадаркі Віктар Пышны расказаў, што гэтыя адхіленні назіраліся падчас устаноўкі фільтраў на свідравінах. Калі праводзяцца якія-небудзь работы на Паўночным водазаборы, патокі вады пераразмяркоўваюцца, павялічваецца расход з Паўднёвага. У такіх выпадках магчыма больш хуткае вымыванне адкладанняў са сценак труб. Таму работнікі арганізацыі чарговы раз нагадваюць аб неабходнасці быць гатовымі да таго, што яшчэ на працягу пэўнага часу магчымы кароткатэрміновыя пад’ёмы ўзроўню жалеза. Калі трубы ачысцяцца цалкам, сказаць цяжка, але працэс ідзе ў правільным кірунку. А яшчэ ёсць лініі з нізкім разыходам вады, дзе яна застойваецца. Таму калі чалавек доўгі час адсутнічаў дома і, адкрыўшы кран, убачыў “жаўтаваты” струмень, магчыма, проста трэба на працягу некалькіх хвілін спусціць ваду, каб яна стала празрыстай.