Дзяжурны па парку станцыі Асіповічы-1 Марыя Рогаль паказала найлепшы вынік у дарожным конкурсе на званне “Лепшы па прафесіі на чыгуначным транспарце”, які прайшоў у Цэнтры кіравання перавозкамі Упраўлення Беларускай чыгункі.

На станцыі Марыя працуе ўжо паўтара дзясятка гадоў: пачынала сігналістам, а праз тры гады яе прызначылі дзяжурным па парку.

У абавязкі спецыяліста ўваходзіць выдача папярэджанняў машыністам лакаматыўных брыгад, у якіх утрымліваецца пералік работ, што вядуцца па ўсім шляху руху цягніка, з указаннем часу іх ажыццяўлення і хуткасці руху на ўказаным участку. Такі дакумент выдаецца лакаматыўнай брыгадзе пад асабісты подпіс. Пасля азнаямлення з абстаноўкай на маршруце машыніст распісваецца на карашку, які вяртае дзяжурнаму. За змену даводзіцца сустракацца з усімі лакаматыўнымі брыгадамі, якія адпраўляюцца ў гэты час у паездку.

Яшчэ адзін адказны і працаёмкі абавязак — замацаванне рухомага саставу тармазнымі башмакамі. У змену звычайна працуе два дзяжурныя з раздзяленнем аналагічнай работы па пасажырскім і грузавым паркам. Згодна з указаннем дзяжурнага па станцыі Марыя ўкладвае неабходную колькасць тармазных башмакоў у залежнасці ад вагі і колькасці восей у складзе цягніка.

Яе работа вельмі адказная, бо выдача папярэджанняў на цягнікі і замацаванне рухомага саставу — аснова асноў бяспекі руху. І са сваімі абавязкамі Марыя спраўляецца паспяхова. Аб гэтым сведчаць вынікі: шэсць разоў яна станавілася пераможцам прафесійнага конкурсу ў Магілёўскім аддзяленні і двойчы — на Беларускай чыгунцы. Упершыню была названа лепшым дзяжурным па парку ў 2023 годзе. І вось чарговае пацвярджэнне поспеху.

— Спаборніцтва ўключала два этапы: камп’ютарнае тэсціраванне і вуснае субяседаванне, — расказвае Марыя. — Прычым пытанні папярэдне не дасылаліся. Дэманстравалі тыя веды і ўменні, якія ёсць у рэчаіснасці.

Павышэннем свайго прафесійнага ўзроўню чыгуначніца займаецца пастаянна, таму і вынік адпаведны. Дарэчы, зараз яна праходзіць профільнае навучанне ў Гомельскім каледжы — філіяле БелДУТ.

— Прыстойны, сумленны чалавек, адказны, дысцыплінаваны работнік, які добра ведае нарматыўную базу, умее працаваць у камандзе, ведае, што такое ўзаемадапамога, падтрымка, — так характарызуе Марыю Рогаль начальнік участка Кацярына Паланейчык.

Дарэчы, перад рэйсам Марыі не раз здаралася выдаваць дакументы і свайму мужу, бо Аляксандр працуе машыністам у лакаматыўным дэпо. Такі вось чыгуначны саюз атрымаўся. Дачка і сын ужо дарослыя: Карына лінгвіст, Аляксей навучаецца ў БНТУ, падрастае ўнучка Мая.