Храм

На святым месцы

Каля трох гадоў таму ў Карытным адкрыўся падворак Прошчы. Храм у гонар іконы Божай Маці “Спарыцельніца хлябоў” і першую літургію асвяціў епіскап Бабруйскі і Быхаўскі Серафім.

Як расказвае іераманах Даміан (Ліпчэўскі), царква ў Карытным існавала яшчэ ў 1746 годзе, але дакладна невядома, хто і калі яе пабудаваў. Дайшлі звесткі пра тое, што ў 1873 годзе на сродкі прыхаджан да храма была прыбудавана званіца.

Ішлі часы, мяняліся прыярытэты. У 30-х гадах мінулага стагоддзя храм закрылі, а настаяцеля разам з царкоўным старастам расстралялі.

Цяперашні будынак узвялі побач з месцам разбуранай калісьці царквы. Найбольш ушаноўваецца тут ікона Божай Маці “Спарыцельніца хлябоў“. Гэты абраз напісаны спецыяльна для храма ў Карытным. Таксама ў царкве ёсць ікона прападобнага Амбросія Опцінскага з часціцамі яго нятленных мошчаў. Ён яшчэ пры жыцці блаславіў напісаць першы абраз Маці Божай “Спарыцельніца хлябоў”.

Настаяцелем прыхода з’яўляецца іераманах Максім (Юндзіл). Ён, а таксама  манаскае братэрства клапоцяцца пра абодва храмы. Службы ў Карытным праходзяць тры разы на тыдзень, на іх можна прыняць прычасць. А калі няма богаслужэнняў, сёстры чытаюць акафіст.

У час нашага візіту ў населены пункт на тэрыторыі храма сустрэлі манахіню Ефрасінню. Яна расказала, што наведаць гэта святое месца можна ў любы дзень, памаліцца, паставіць свечку. Сюды прыязджаюць цэлымі сем’ямі. Пакуль дарослыя знаходзяцца ў царкве, малыя гуляюць на дзіцячай пляцоўцы, абсталяванай каля храма. Тут многа кветак, прыгожа ў любую пару года. Нават чароды буслоў, журавоў і іншых птушак, пралятаючы міма, робяць круг над культавым будынкам, нібы аддаючы дань павагі.