Новы аўтобус папоўніў Аўтапарк № 19

Па словах дырэктара аўтапарка Юрыя Начыны, МАЗ-206 адрозніваецца ад сваіх папярэднікаў перш за ўсё ўнутраным начыннем: рухавікі і каробкі перадач ад кампаніі “Mercedes-Benz” замянілі на аналагічныя агрэгаты кітайскай вытворчасці.

Па-другое, за кошт змянення кампаноўкі салона ўдалося павялічыць колькасць сядзячых месцаў з 23 да 27.

— Новы аўтобус ідэальна падыходзіць для горада, — адзначае Юрый Ігаравіч. — Мы пускаем яго па тых маршрутах, дзе па-за часам пік ездзіць мала пасажыраў і выкарыстоўваць вялікі аўтобус-“гармошку” немэтазгодна. Гэтая мадэль добра зарэкамендавала сябе і ў паездках па раёне. Да канца года атрымаем яшчэ адзін аўтобус — МАЗ-203.

Кіраваць транспартным сродкам даверылі вопытнаму вадзіцелю Аляксандру Савіцкаму.

— Аўтобус невялікі, але разам з тым зручны, — лічыць Аляксандр Альбертавіч. — Устаноўлены камеры відэаназірання, што важна для бяспекі пасажыраў, больш дасканалая панэль кіравання. Адметны ён і наяўнасцю закрытай вадзіцельскай кабіны: нішто не адцягвае ўвагу вадзіцеля ад дарогі .