Чаму ў адны пад’езды заходзіць прыемна, радуе знешні выгляд сцен, парэнчаў, чысціня і нейкая хатняя ўтульнасць, а трапляючы ў іншыя, прабягаеш хуценька лесвічныя маршы, не жадаючы доўга затрымлівацца на недагледжанай прасторы?

Патрэбны ці не?

Складнікаў парадку ў пад’ездзе нямала, і стан паштовых скрынак — адзін з іх. Кожнаму даводзілася бачыць скрынкі з пагнутымі, абпаленымі, а то і наогул адламанымі дзверкамі, многія з якіх не зачыняюцца і гойдаюцца, нібы нейкі недарэчны аксесуар. На пытанне да жыхароў, чаму яны не звяртаюць на гэта ўвагі, даводзілася чуць: “А навошта нам тыя скрынкі? Газет і часопісаў мы не выпісваем. Перапіску вядзём у “Вайберы”. А ўсё рэкламнае смецце, якое нам рэгулярна прыносяць, не чытаючы, выкідаем у кантэйнер”.

Але хочацца запярэчыць: хоць сучаснікі амаль не пішуць папяровых пісем і паштовак і ўжо не чакаюць такіх ад іншых, тым не менш калі-нікалі прыходзіцца атрымліваць афіцыйныя лісты з нейкіх інстанцый, уведамленні, розныя квіткі, запрашэнні, рэкламныя лістоўкі, а часам і вы-пісаць перыядычнае выданне захочацца. Словам, спісваць паштовыя скрынкі ва ўтыль, думаецца, ранавата: яны працягваюць выконваць сваю функцыю. А вось хто павінен сачыць за станам гэтага сродку дастаўкі інфармацыі, разабрацца не перашкодзіць.

Клопат жыльцоў

Хоць яшчэ сустракаюцца выпадкі, калі скрыні размяшчаюцца ў дварах, але абсалютная большасць даўно перабралася ў  пад’езды і асталявалася на сцяне паміж першым і другім паверхамі. А таму ніякія свавольствы надвор’я ўплыву на захаванасць гэтай маёмасці не аказваюць, і ўсё залежыць выключна ад адносін насельнікаў. Да таго ж па заканадаўстве краіны адказнасць за ўтрыманне паштовых скрынак і іх цэласнасць самі жыхары і нясуць. Яны могуць самастойна гэту рэч адрамантаваць або замяніць. Калі скрынка мае зусім непрывабны выгляд, прыйдзецца рамантаваць або мяняць увесь блок. Але рабіць гэта са згоды жыльцоў і за іх сродкі.

Дарэчы, РУП “Белпошта” прапаноўвае паслугі па ўстаноўцы, замене і рамонце паштовых скрынак, размешчаных у пад’ездах жылых дамоў і прыватным сектары. Для гэтага неабходна звярнуцца ў аб’ект паштовай сувязі, які вас абслугоўвае, для афармлення і аплаты адпаведных паслуг. Кошт залежыць ад ступені рамонту (у сярэднім ад 5 да 21 рубля). Але ў аддзяленні сувязі Асіповіччыны на працягу некалькіх гадоў падобных зваротаў не паступала.

Некаторыя індывідуальныя прадпрымальнікі таксама працуюць у гэтым кірунку. Давялося пагутарыць з адным з іх. Станіслаў Бельскі размяшчае паведамленні аб паслугах на дошках аб’яў у пад’ездах шматкватэрных дамоў, але, як ён адзначыў, у Асіповічы папярэдні раз прыязджаў гадоў пяць таму, калі паступалі заяўкі. Дарэчы, зараз зноў наведаўся. Кошт рамонту адной ёмістасці для газет вагаецца ў сярэднім ад 20 да 30 рублёў. Малады бізнесмен можа замяніць замок, дзверцы або ўсю секцыю. Але зваротаў з нашага райцэнтра не так і многа, хоць стан многіх скрынак вымушае жадаць лепша-га.

Погляд з іншага ракурсу

Як расказваюць работнікі камунальнай службы, у ходзе эксплуатацыі замкі ёмістасцей для карэспандэнцыі выходзяць са строю не так і рэдка, губляюцца і ключы. Але акуратныя жыльцы звычайна самастойна спраўляюцца з праблемай: калі неабходна, замяняюць замок, набываюць новы ключ, раўняюць або падфарбоўваюць дзверцы. Майстар УКП ЖКГ Таццяна Раманоўская адзначае: “На маім участку каля 70 шматкватэрных дамоў. Размешчаны яны на вуліцах Чарняхоўскага, Патоцкага, у Верайцах, на паўднёвым баку горада. Прычым менавіта ў дамах старой забудовы выгляд скрынак часта засмучае. У  новабудоўлях яны, зразумела, больш акуратныя. На жаль, не ўсе жыхары захоў-ваюць правілы догляду маёмасці, здараецца, што шкоднічаюць дзеці або  безадказна ставяцца іх бацькі”.

А вось старшыня таварыства ўласнікаў “Чыгуначнік-5” Уладзімір Міха-дзюк пазначыў, што там, дзе ёсць гаспадары, і стан  пад’ездаў адрозніваецца: “За 22 гады, што існуе наш дом, ні разу не даводзілася мяняць або рамантаваць паштовыя скрынкі. Калі хто ключ згубіць — закажа новы, і больш ніякіх праблем. І наогул хуліганскіх выхадак у нас не назіраецца, тым больш пасля таго, як устанавілі відэакамеры”.

Без сувязі

Калі падумаць, выгляд скрынак служыць свайго роду індыкатарам ладу жыцця жыхароў: адламаныя ці сапсаваныя дзверцы сведчаць аб тым, што ў дадзеную кватэру не толькі не прыходзіць перыёдыка, але і насельнікі кватэры абыякава да ўсяго ставяцца. Як паведаміла начальнік участка паштовай сувязі Бабруйскага рэгіянальнага вузла паштовай сувязі Магілёўскага філіяла РВПС “Белпошта” Надзея Багачова, у сапсаваныя скрынкі паштовыя адпраўленні і газеты не кладуцца. Адрасату пакідаецца апавяшчэнне, каб наведаў паштовае аддзяленне, дзе яму і ўручаць карэспандэнцыю.

Вядома, у добраўпарадкаванні нашых дамоў і дваровых тэрыторый нямала недапрацовак. А паштовая скрынка — драбнота ў параўнанні з іншым. І тым не менш раз яна ёсць, то павінна быць спраўнай.