На будынку лясгаса з’явіліся памятныя дошкі
Напярэдадні прафесійнага свята работнікаў лесу і Дня народнага адзінства на тэрыторыі Асіповіцкага лясгаса прайшло ўрачыстае мерапрыемства, якое аб’яднала некалькі падзей.
У гонар заслужанага лесавода БССР Мікалая Новікава і заслужанага лесавода Рэспублікі Беларусь Мікалая Раўбеля ўстанавілі памятныя дошкі. На ўрачыстасці прысутнічалі іх жонкі Эльза Новікава з сынам Андрэем і ўнукамі Максімам і Мікалаем, Тамара Раўбель з дачкой Інгай, а таксама генеральны дырэктар Магілёўскага дзяржаўнага вытворчага лесагаспадарчага аб’яднання Сяргей Максімовіч, старшыня раённага Савета дэпутатаў Сяргей Сувееў, намеснік старшыні райвыканкама Аляксандр Ганчароў.
Званне заслужанага лесавода краіны прысвоена Мікалаю Новікаву ў 1986 годзе. Да таго ж ён быў узнагароджаны знакамі 10, 20, 30 гадоў службы ў дзяржаўнай лясной ахове. З 1973 па 1999 гады Мікалай Іосіфавіч быў дырэктарам Асіповіцкага лясгаса. Яго змяніў Мікалай Раўбель, у скарбніцы якога два бронзавыя медаля за дасягнутыя поспехі ў развіцці народнай гаспадаркі СССР, медаль “За трудовую доблесть”, ордэн Пашаны, званні “Ганаровы лесавод”, “Чалавек года Магілёўшчыны”, “Ганаровы грамадзянін Асіповіцкага раёна” і “Заслужаны лесавод Рэспублікі Беларусь”. У іх гонар прагучала шмат цёплых слоў, а памяць ушанавалі хвілінай маўчання.
Не абышлося на ўрачыстасці без узнагарод. Акрамя лепшых работнікаў лясгаса, увагі была ўдастоена кіраўнік школьнага лясніцтва СШ № 3, чалавек года Магілёўшчыны і выдатнік адукацыі Святлана Зайцава. Святочны настрой прысутным ствараў ваенны аркестр 51 гвардзейскай артбрыгады.
