На Асіповіцкім заводзе транспартнага машынабудавання адбылася экскурсія для дзяцей работнікаў прадпрыемства

Ідэя незвычайнага мерапрыемства нарадзілася ў межах супрацоўніцтва адміністрацыі і прафсаюзнай арганізацыі прадпрыемства, а таксама як пэўны крок у развіцці прамысловага турызму.

Мы хацелі паказаць юным гасцям не толькі месца работы іх бацькоў і распавесці пра працэс зборкі вагонаў, а галоўным чынам накіраваць погляд маладога пакалення на тэхнічныя спецыяльнасці, працу на заводзе і, як след, фарміраванне дынастый, — адзначыў намеснік дырэктара па ідэалагічнай рабоце Максім Пікарэвіч.

Пад кіраўніцтвам экскурсавода рабяты разам з бацькамі прайшліся па ўсіх цэхах, азнаёміліся з этапамі стварэння розных відаў вагонаў, паглядзелі на працэс афарбоўкі і выяўлення дэфектаў.

Завяршыла экскурсію наведванне сталовай АЗТМ, дзе хлопчыкі і дзяўчынкі падсілкаваліся вырабамі завадскіх павароў, а пасля атрымалі невялікія падарункі з сімволікай прадпрыемства.