На ўрачыстай цырымоніі, прысвечанай прафесійнаму святу, 12 працаўнікоў Беларускай чыгункі былі ўзнагароджаны нагрудным знакам «Ганаровы чыгуначнік». Сярод іх і начальнік нашай дыстанцыі сігналізацыі і сувязі Сяргей Анціпаў.

Яго агульны стаж работы ў галіне 44 гады. Пачынаў электраманцёрам, праходзячы па парадку ўсе прыступкі   кар’ернай лесвіцы: электрамеханік, старшы электрамеханік, намеснік начальніка дыстанцыі сігналізацыі і сувязі. А дзесяць гадоў таму ўзначаліў прадпрыемства.

Работа за апошнія дзесяцігоддзі істотна змянілася: аналагавая сувязь паступова здала пазіцыі, яе месца заняла лічбавая. На працягу 2014-2018 гадоў на ўчастку Асіповічы-Жлобін устаноўлены мікрапрацэсарныя ўстройствы. Таму Сяргею Генадзьевічу пастаянна даводзіцца павышаць прафесійны ўзровень не толькі свой, але і падначаленага яму калектыву.

Трэба адзначыць, што работа ў сувязістаў даволі адказная. Нягледзячы на асаблівасці надвор’я і свавольствы прыроды, рух чыгуначнага транспарту павінен ажыццяўляцца пастаянна і ў бяспечных умовах. А гэта патрабуе пэўнай самааддачы чыгуначнікаў. Сяргей Генадзьевіч упэўнены, што працуюць на прадпрыемстве сапраўдныя прафесіяналы. Ён ганарыцца тым, што работа намесніка начальніка дыстанцыі сігналізацыі і сувязі Вячаслава Бірулі днямі была адзначана Ганаровай граматай начальніка Беларускай чыгункі, а партрэт электрамеханіка сувязі Ігара Маскалюка занесены на Дошку гонару Магілёўскага аддзялення. Дарэчы, «Ганаровых чыгуначнікаў» у дыстанцыі цяпер шэсць.