Міні-выстава раённага гісторыка-краязнаўчага музея, прысвечаная Дню Кастрычніцкай рэвалюцыі, прымае гасцей з пачатку лістапада

Размясціліся экспанаты на другім паверсе ГЦК “Равеснік” у карціннай галерэі народнага мастака Беларусі Уладзіміра Стэльмашонка.

Прэзентацыя хоць і нешматлікая, але па-сапраўднаму адметная. Як расказала галоўны захавальнік фондаў Кацярына Саканцава, раней падобныя выставы ў асноўным ладзіліся з экспанатаў, якія прадастаўлялі ў часовае карыстанне неабыякавыя асіпаўчане. І вось сёлета гэта ўжо паўнавартасная прадметная выстава самога музея. Увогуле папаўненне фондаў — справа няпростая. У тым ліку і датычна рознай савецкай сімволікі, якой, здавалася б, было вельмі шмат. Аднак зараз адпаведныя рэчы знайсці не так і лёгка. І тут таксама дапамагаюць землякі. Сёлета  жыхарка Лапічаў Ганна Прановіч перадала тэматычную падборку — свайго роду спадчыну ад матулі Валянціны   Ігнацьеўны Архіпенка, якая была настаўніцай пачатковых класаў у мясцовай школе.

— Памятаю, у дзяцінстве ў пакоі стаяла кніжная шафа, якая заўсёды прыцягвала ўвагу: тут захоўвалася многа ўсялякіх кніг, альбомаў, буклетаў, — успамінае Ганна Іванаўна. — І вось, перабіраючы гэты скарб праз дзесяцігоддзі, вырашыла, што больш карысці друкаваная прадукцыя прынясе, калі знойдзе сваё месца ў музеі. У выніку перадала камплекты паштовак “Ленин — вождь Октября”, “Надежда Константиновна Круп-ская”, “Дом-музей Ленина в  Ульяновске”, “Владимир Ильич Ленин”. Яны ўтрымліваюць шмат цікавых матэрыялаў. Таксама шэраг кніг аб правады-ры рэвалюцыі, выдадзеных у      60-70-х гадах. Ведаю, што музей часта наведваюць школьнікі, для якіх такая інфармацыя будзе асабліва карыснай.

Сапраўды, у гэтыя канікулярныя дні міні-выставу наведала ўжо нямала вучняў. Дзецям цікава! Прадстаўленыя матэрыялы рознабакова раскрываюць асобу Уладзіміра Леніна, у тым ліку як лідара вялікай рэвалюцыі.  Дарэчы, каб лепш разгля-дзець экспанаты, іх можна патрымаць у руках  — для гэтага ў музеі ёсць спецыяльныя пальчаткі. А каб лепш зразумець, існуе магчымасць атрымаць адказы на  пытанні, якія ўзнікаюць у час азнаямлення з выставай.