Коратка аб розным у Асіповіцкім раёне
314 3 октября 2025 12:52
- Асіповіцкі завод транспартнага машынабудавання прыняў удзел у міжнароднай прамысловай выставе “ИННОПРОМ. Беларусь”, якая ўпершыню прайшла ў Мінску з 29 верасня па 1 кастрычніка. Усяго сваю прадукцыю на выставачнай экспазіцыі прадэманстравалі 520 кампаній з Расіі, Беларусі, Узбекістана, Казахстана і Кыргызстана.
- “Зорныя арэлі” — новы зборнік мясцовай пісьменніцы Лёлі Багдановіч. Чарговая кніга казак літаральна на гэтым тыдні выйшла ў свет накладам 1 100 асобнікаў, яна ўключае звыш паўсотні цікавых твораў для дзяцей. Набыць выданне можна ў кнігарнях сталіцы.
- Планавая прызыўная кампанія працягваецца ў раёне. Зараз праходзяць медыцынскія агляды, пасяджэнні прызыўной камісіі, адборы прызыўнікоў у канкрэтныя воінскія часці. На гэты раз прызыву падлягае каля 300 маладых людзей, з іх больш за 170 накіраваны на медыцынскую камісію. На тэрміновую і службу ў рэзерве гэтай восенню плануецца адправіць больш за 60 чалавек. Таксама мае папулярнасць і служба па кантракце: кожны трэці прызыўнік афармляецца менавіта для яе праходжання.
- Сістэма прафесійна-тэхнічнай адукацыі Беларусі ўчора святкавала 85-годдзе. З 2003 года ў Асіповічах таксама рыхтуюць прадстаўнікоў шэрагу прафесій. Сёння мясцовы каледж навучае будучых прадаўцоў, павароў, швачак, цырульнікаў, тынкоўшчыкаў, электрагазазваршчыкаў, электраманцёраў, маляроў, слесараў па рамонце сельгасмашын і абсталявання, трактарыстаў-машыністаў і вадзіцеляў катэгорыі С.
