Коратка аб розным
200 4 мая 2025 13:23
- Магазін “Паштавік”, які размешчаны ў будынку Асіповіцкага ўчастка паштовай сувязі і мае выхад на чыгуначны перон, карыстаецца ў землякоў усё большай папулярнасцю. Так, за першы квартал тут рэалізавана тавараў на 30,3 тысячы рублёў, што на 7,1 тысячы больш, чым за аналагічны леташні перыяд. Наведвальнікам прапануюцца прадукты харчавання, у тым ліку разнастайныя каўбасы, рыба, хлебабулачныя і кандытарскія вырабы. Таксама ў гэтай гандлёвай кропцы можна набыць бытавую тэхніку, пасцельную бялізну, ручнікі, посуд і іншыя тавары паўсядзённага ўжытку.
- Дзіцячыя сады раёна наведваюць 1 642 выхаванцы, з якіх 1 340 — у райцэнтры. Самая шматлікая ўстанова — Асіповіцкі дашкольны цэнтр развіцця дзіцяці, дзе функцыянуе 16 груп з 246 хлопчыкаў і дзяўчынак, а найменшая колькасць дзяцей у дзіцячым садзе № 5 “Маяк” на пас. Савецкім — 34 чалавекі ў дзвюх групах.
- 19 садаводчых таварыстваў агульнай плошчай 531 гектар размяшчаецца на тэрыторыі раёна. У таварыствах грамадзянам прадастаўлена 3 765 зямельных участкаў (301 га) для калектыўнага садаводства. У пералік незанятых зямельных участкаў уключана 1 134 участкі, якія могуць быць прадастаўлены грамадзянам. Даныя звесткі размешчаны ў дзяржаўнай інфармацыйнай сістэме “Адзіны рэестр маёмасці”.
