Пацвярджаючы сваю назву, снежань сустрэў нас шчодрымі снегападамі. А калі снегу шмат, гэта стварае сур’ёзныя нязручнасці

Пра тое, якія меры прымаліся па расчыстцы дарог, двароў і вуліц, паселішчаў, раёнка ўжо паведамляла. Сёння ж закранём менш відавочныя аб’екты.

Намеснік дырэктара УКП ЖКГ Сяргей Салавей запэўніў, што дарогі да ўсіх населеных пунктаў расчышчаны і транспартная сувязь з імі не парывалася. Але, акрамя шляхоў зносін для штодзённага карыстання, ёсць і тыя, што патрэбны выключна ў асаблівых абставінах.

* * *

Як расказаў старшыня Пратасевіцкага сельвыканкама Анатолій Дрывіцкі, на яго асаблівым кантролі знаходзяцца пад’язныя шляхі да могілак. Калі хтосьці з жыхароў памірае, родныя паведамляюць аб гэтым ва ўстанову мясцовай улады, а старшыня ў самыя сціслыя тэрміны знаходзіць арганізацыю, якая выканае адпаведныя работы. Так, днямі звяртаўся ў ДРБУ № 199, работнікі якога расчысцілі дарогу да могілак у Дварку. Адгукаецца на падобныя звароты і УКП ЖКГ. Пагрузчык ААТ “Асіповічыаграпрамтэхзабеспячэнне”, які працаваў на ферме, расчысціў і шлях да могілак у Ставішчы.

Дрычынскі сельсавет даволі аддалены ад райцэнтра, але і там барацьба са снегам вядзецца аператыўна. Старшыня Мікалай Яромаў падтрымлівае пастаянную сувязь з ДРБУ № 199, ДЭУ № 73, УКП ЖКГ, ТАА “Сельгасінвест”, якія заўсёды аказваюць дапамогу ў расчыстцы снегу. Калі ж плануецца пахаванне нябожчыка, кожная з дарожных і камунальных арганізацый па заяўленчым прынцыпе разграбае дарогу да патрэбнага пагосту.

Прыблізна такім жа чынам вырашаецца гэта праблема і ў іншых сельсаветах.

* * *

Выраслі снежныя шапкі і на дахах будынкаў. Гэта акалічнасць вельмі хвалюе выратавальную службу.

— Нетрываласць будаўнічых канструкцый у сукупнасці са снегавой нагрузкай нярэдка прыво-дзяць да абвальвання дахаў, — распавядае інспектар сектара прапаганды і ўзаемадзеяння з грамадскасцю РАНС Андрэй Русаковіч. — Сход снегу з дахаў таксама ўяўляе небяспеку для людзей. Таму кіраўнікам арганізацый і прадпрыемстваў неабходна прыняць меры па ачыстцы дахаў будынкаў і збудаванняў падведамасных аб’ектаў. Счышчаць снег з дахаў трэба і ўладальнікам прыватных дамоў. Пакуль у рэгіёне сітуацыя не крытычная, але зіма толькі пачалася і наперадзе яшчэ не адзін снегапад. Таму неабходныя работы трэба праводзіць, калі таўшчыня снежнай “шапкі” дасягнула 15-20 сантыметраў. І яшчэ парада з практыкі: размяркоўваць скінуты снег трэба раўнамерна, гэта дапаможа пазбегнуць падтаплення вясной.

Пешаходам рэкамендуецца часцей глядзець ўгору і трымацца на бяспечнай адлегласці ад патэнцыяльных пагроз як у паселішчах, так і на ўлонні прыроды. Снег, які падае з даху, здольны нанесці чэрапна-мазгавую траўму. Дрэвы ж пад цяжарам снегу спачатку прагінаюцца, а потым, як правіла раптоўна, ламаюцца.