Каб горад заставаўся зялёным
Лета нарэшце ўступіла ў свае правы — слупкі тэрмометраў нават у памяшканнях набліжаюцца да меткі ў +30°С. Здаецца, нават паветра накалілася, і хочацца толькі двух рэчаў: вады і ценю.
У такую спякотную пару няпроста даводзіцца зялёнаму ўбранству горада. Каб яно працягвала жыць, неабходны сістэматычны паліў. Гэтым займаюцца работнікі УКП ЖКГ.
Расказвае майстар прадпрыемства Людміла Бань:
— Штодзённа два ўборшчыкі тэрыторыі паліваюць клумбы, кветачнікі, размешчаныя на дарожнай агароджы, газоны. Работу пачынаюць з пяці раніцы, каб не пашкодзіць лісце і кветкі дэкаратыўных культур, выклікаўшы іх апёкі. Паліваем таксама дрэвы і кусты, якія сёлета пасадзілі. Іх паліў ажыццяўляецца да 15 гадзін.
Начальнік транспартнага цэха Сяргей Ганчаронак адзначае, што за дзень на паліў клумб і газонаў затрачваецца да трох цыстэрн вады па 3 500 літраў кожная — за дзень гэта больш за
10 000 літраў.
Іна Заскевіч
