Бадай кожны пасажыр чыгункі  хоць аднойчы заварожана сачыў за патокам цягнікоў, якія рухаюцца ў розных напрамках праз станцыю, і здзіўляўся,  як  пры такім інтэнсіўным руху вытрымліваюцца графікі, саставы прыбываюць на патрэбную платформу, а грузавыя вагоны, “пабегаўшы”  па пуцях,  нібы ў камп’ютарнай гульні, выстройваюцца ў саставы. Каб спрытна і граматна кіраваць усім гэтым рухам, патрэбны прафесійныя веды, лагічнае мысленне, здольнасць хутка прымаць рашэнні.

Чвэрць веку працуе на стальной магістралі Іна Касцючэнка. Скончыўшы ў 1999 годзе Аршанскі чыгуначны тэхнікум, прыбыла на станцыю Асіповічы-1 аператарам паста цэнтралізацыі МП-1, а праз два гады была назначана дзяжурным па станцыі.

Іна Леанідаўна адпраўляе грузавыя і пасажырскія цягнікі, пад яе кантролем знаходзяцца фарміраванне саставаў цягнікоў і ўсе манеўровыя работы, што ажыццяўляюцца на станцыі.

За суткі станцыя прапускае каля 140 цягнікоў.

Асабліва складана працаваць у начныя дзяжурствы, адзначае Іна Леанідаўна. Выручае тое, што абавязкі паміж дзяжурнымі па станцыі, дзяжурнымі па горцы, манеўровымі дыспетчарамі, якія  працуюць у адну змену, строга рэгламентаваны, дэталёва прапісана не толькі паслядоўнасць аперацый, але і  кожнае слова, кожная каманда, якую перадаюць адзін аднаму ўдзельнікі цягніковай і манеўровай работы.

А пасля напружанай змены Іна Касцючэнка спяшаецца дадому, дзе яе чакае дачка Анастасія — вучаніца выпускнога класа СШ № 1. Ім ёсць пра што пагутарыць, абмеркаваць. Дзяўчына толькі вызначаецца з будучай прафесіяй, і матуля ўпэўнена, што падтрымае любы яе выбар.