З-за праходжання халоднага атмасфернага фронту, які сфарміраваўся на поўначы Еўропы, у сераду на Асіповіччыне бушаваў штармавы вецер — стыхія натварыла нямала шкоды.

Як расказалі ў УКП ЖКГ, на тэрыторыі горада было павалена больш за 20 дрэў. “Прарэджана” зялёнае ўбранства вуліц Абросімава, Рабоча-Сялянскай, Крыловіча, Міхалкіна і іншых. Упала некалькі дрэў у абодвух гарадскіх парках. Свавольнік вецер перакуліў аўтобусныя прыпынкі ў завул­ку Чарняхоўскага і на вуліцы Інтэрнацыянальнай.

Работнікі УКП ЖКГ аператыўна правялі работы па расчыстцы дарог і тратуараў ад галля і ствалоў дрэў, адразу распілавалі іх. Працавалі дапазна. Учора работы працягнуліся.

Вецер пашкодзіў і лініі электраперадач. Былі адключаны дзве лініі 10 кВ, абясточаны 21 населены пункт. На ліквідацыю вынікаў стыхіі было накіравана сем брыгад у складзе 31 чалавека, працавала спецтэхніка: аўтавышкі, мабільныя рабочыя платформы. Да поўначы электразабеспячэнне было адноўлена.

У розных кропках раёна назіралася пашкоджанне дахаў, падзенне дрэў. Да ліквідацыі наступстваў стыхіі падключыліся ДЭУ-73, ДРБУ-199, лясгас і іншыя арганізацыі.

Кацярына Іванова