У распараджэнні дыспетчара Асіповіцкага раёна электрычных сетак Аляксандра Габрыеля знаходзіцца 14 падстанцый і 1 334,7 кіламетра ліній электраперадач рознай магутнасці.

— Спецыфіка дзейнасці дыспетчара РЭСа істотна адрозніваецца ад аналагічнай у ЖКГ або МНС, — тлумачыць Аляксандр Яўгенавіч. — Там у асноўным прымаюць заяўкі і апавяшчаюць спецыялістаў аб тых ці іншых сітуацыях. На мне ж ляжыць большая адказнасць: каардынаваць дзеянні ўсіх брыгад на змене, дапускаць электраманцёраў да працы. Таксама адказваю за аператыўнае адключэнне лініі электрасетак пры неабходнасці, шукаю аптымальныя рашэнні для падключэння пакінутага без электрычнасці ўчастка, вырашаю, якую брыгаду лепш адправіць. Усё гэта трэба рабіць аператыўна. Таму тут важныя ўпэўненыя веды, лагічнае мысленне і хуткасць рэакцыі. Яшчэ ў мае абавязкі як дыспетчара ўваходзіць узгадненне з насельніцтвам і арганізацыямі заявак па падключэнні або адключэнні электразабеспячэння. Тут крыецца яшчэ адна складанасць дыспетчарскай працы: часам няпроста знайсці агульную мову са спажыўцом. Аднак гляджу на гэту акалічнасць філасофскі: пераадольваючы цяжкасці, мы становімся мацнейшымі.

Ганна Сабела