Днямі старшыня райвыканкама Канстанцін Жыгуцкі ўручыў Вользе Грынені ордэн Маці

Вольга і Аляксандр Грынені іншым сваё жыццё нават і не ўяўлялі. Паколькі самі гадаваліся ў шматдзетных сем’ях, заўсёды ведалі, што ўласных дзетак таксама будзе не менш, чым трое. Зараз яны выхоўваюць трох сыноў і дзвюх дачок. Старэйшаму хлопчыку Артуру хутка споўніцца 14 гадоў. Закончыў музычную школу па класе фартэпіяна.

Самы разважлівы, падлетак цікавіцца тэхнікай. Васьмігадовы Данііл цягнецца да спорту, дапамагае бацьку рамантаваць машыну і даводзіць да ладу дом. Таксама вучыцца іграць на фартэпіяна. Сямігадовая летуценніца Кіра сёлета пойдзе ў першы клас, а Багдана, якой у верасні споўніцца чатыры, сапраўдная гарэза: ні хвіліны не сядзіць на месцы. Хутка пойдзе ў яслі і самы малодшы паўтарагадовы Мацвей.

Грынені жывуць у Татарцы, праводзяць рэканструкцыю ўласнага дома. Вядома, вялікай сям’і патрэбна шмат месца. Тата працуе ў цэху здабычы торфу філіяла “Бабруйскія цеплавыя сеткі” і, па словах шчаслівай матулі, з’яўляецца надзейным плячом і апорай сям’і.

Адзін за ўсіх і ўсе за аднаго — такі прынцып зносін тут замацаваўся. Вельмі дружныя, бацькі і дзеці заўсёды імкнуцца дапамагчы адзін аднаму. Напэўна, такой і павінна быць сапраўдная сям’я.

— Атрымаць ганаровую ўзнагароду было вельмі хвалююча і пачэсна, — дзеліцца ўражаннямі Вольга Аляксандраўна. — Гэта асаблівы статус. Прыемна, што дзяржава звяртае ўвагу на шматдзетныя сем’і, заахвочвае і падтрымлівае іх.