Яскравым прыкладам “абмежаванай зручнасці” ў нашым горадзе можна лічыць фірменны магазін “Світанак”. Асартымент задаволіць любога пакупніка: зойдзеш — вочы разбягаюцца. Аднак паміж стойкамі з адзеннем нельга прайсці, каб не зачапіць тавар; вешалкі з адзеннем забіты колькі мажліва; пакуль дастанеш рэч, якая цікавіць, скінеш тую, што побач. Ды яшчэ і да касіра не дабрацца, бо цесна.

Днямі злавіла момант, калі адміністратар, здаецца, вырашыў пажартаваць над пакупнікамі. Перад святам, 22-23 лютага, у  магазіне дзейнічалі добрыя зніжкі, асабліва на мужчынскае адзенне. Вядома, прыхільнікі беларускай якасці паспяшаліся набыць падарункі для сваіх мужчын. І вось перад імі “намаляваўся” квэст: падлога перад вешалкамі застаўлена цюкамі вышэй за калена. Каб дабрацца да тавару, неабходна пераступіць-пералезці гэтую перашкоду, бо адцягнуць амаль непад’ёмныя цюкі ўбок слабаму полу немагчыма. Тым, хто прайшоў “першы ўзровень”, прапануецца вызначыцца з неабходным па колеры тканіны, якая выглядае з шэрагаў шчыльна спрасаванага адзення. Потым паспрабаваць выцягнуць рэч, якая зацікавіла, і адначасова не скінуць на падлогу тыя, што вісяць побач. Выцягнулі, паглядзелі — не падыходзіць. Адчуваеце ўсю насычанасць расчаравання?

Калісьці раёнка ўжо крытыкавала нязручнае размяшчэнне тавару ў магазіне (гл. “АК” № 7 ад 29.01.2021 г.). Дырэктар філіяла № 2 ААТ “Світанак” Вольга Марчанкова тады расказала пра планы перанесці фірменны магазін у нашым горадзе на большыя плошчы (гл. “АК” № 21 ад 19.03.2021 г.). Прайшло амаль два гады, але воз і цяпер там…