Пра асіпаўчан, якія вярнуліся пасля заканчэння вучэбных устаноў працаваць у родны горад, расказваць асабліва прыемна. Гэта, мабыць, і ёсць яскравае сведчанне любові да таго месца, дзе нарадзіўся.

Не расчаравана работай у Асіповічах і спецыяліст па продажах ААТ “Асіповіцкі хлебазавод” Дар’я Шачок. Вучылася яна ў СШ № 3, а пасля заканчэння 9 класаў накіравалася за прафесійнымі ведамі ў сталіцу. Час у вучнёўскіх аўдыторых Мінскага дзяржаўнага каледжа тэхналогіі і дызайну лёгкай прамысловасці праляцеў хутка, і вось дзяўчына зноў на малой радзіме ўжо ў якасці дыпламаванага спецыяліста.

Спачатку працавала прадаўцом у магазіне “Суседзі”, а з нядаўняга часу перайшла ў аддзел збыту хлебазавода. Спецыяліст па продажах — гэта супрацоўнік, які звязвае прадпрыемства з кліентамі. Сучасны менеджар — гэта і кансультант, і аналітык. Яго асноўная задача — дакладна вывучыць і зразумець запыты кліента і прапанаваць аптымальнае рашэнне з асартыменту прадпрыемства. Ну і, канечне, умець аргументаваць выбар партнёраў, каб у іх засталося перакананне, што крок зроблены адназначна правільны.

Вялікае значэнне ў асваенні прафесіі мае калектыў, лічыць Дар’я. Маладому працаўніку аказваецца рознапланавая падтрымка і з боку калег, і ад кіраўніцтва. Спачатку было страшнавата тэлефанаваць партнёрам, часам узнікала сумненне, што ўсё робіш дакладна, не дапускаеш памылак у афармленні заявак. Аднак Дар’я асвойвае работу хутка. Нават сама крыху здзіўляецца, як атрымалася ў кароткія тэрміны запомніць шматлікія коды прадукцыі. Трэба мець таксама навыкі лагістыкі: калі аўтамабіль з вырабамі адпраўляецца па маршруце — а самыя працяглыя яны да Магілёва і Рагачова, — мэтазгодна, каб машына дастаўляла свой важны груз у максімальную колькасць гандлёвых кропак. Адсюль — выяўляюцца схаваныя       магчымасці, завязваюцца новыя партнёрскія сувязі. Словам, работа адназначна не сумная.

Цікавіць Дар’ю і рэклама прадукцыі ў сацыяльных сетках. Часам дапамагае сваёй каляжанцы рабіць матэрыялы для постаў у «Iнстаграм». А як інакш — зараз без інтэрнэту складана ўявіць маркетынг. Ну, акрамя таго, што прадукцыя павінна быць смачнай і якаснай — гэта ўмова заўсёды лепшы рухавік продажу.