Прафсаюзнае жыццё

Працаваць у бяспечных умовах і рэгулярна атрымоўваць заробак — забеспячэннем рашэння гэтых задач займаюцца прафсаюзы

Днямі прайшло пасяджэнне Савета Асіповіцкага райаб’яднання прафсаюзаў, у рабоце якога прыняў удзел старшыня абласнога аб’яднання Дзмітрый Янкоў. Разглядалася бягучая сітуацыя, а таксама прапановы па ўнясенні змяненняў у Канстытуцыю Рэспублікі Беларусь.

— Прафсаюзы занялі самую актыўную пазіцыю ў палітычным жыцці краіны, — адзначыла ў сваім выступленні старшыня раённага аб’яднання прафсаюзаў Алена Паргачова. — Мы прынялі актыўны ўдзел ва ўсіх этапах выбарчай кампаніі: збіралі подпісы, працавалі ў камісіях.

Не засталіся ў баку ад праблем, звязаных з эпідэмічнай сітуацыяй. Пры райаб’яднанні была створана рабочая група і валанцёрскі атрад для аказання дапамогі пажылым грамадзянам. Сфарміраваны касы ўзаемадапамогі. Федэрацыяй было прынята рашэнне аб пералічэнні грашовых сродкаў у памеры 2 працэнтаў членскіх узносаў на рахункі райаб’яднанняў прафсаюзаў. У Асіповіцкае, напрыклад, паступіла больш за 6 900 рублёў. Набываліся ахоўныя касцюмы, аказана матэрыяльная дапамога членам прафсаюза, якія перанеслі кавід. Усе разам стварылі фонд дапамогі медыкам, якія знаходзяцца на перадавой і лечаць у тым ліку і членаў прафсаюзаў.

Пандэмія, на жаль, не скончылася. Яна па-ранейшаму ўплывае на нашу эканоміку. У сувязі з чым у верасні Федэрацыя прафсаюзаў накіравала ва ўрад пакет прапаноў. Атрымалі падтрымку ў ініцыятывах аб вылучэнні дадатковых сродкаў грамадскаму транспарту, магчымасці наймальніка аплочваць водпуск работнікам, якія з’яўляюцца кантактамі другога ўзроўню, і ствараць на прадпрыемствах “залатую змену” для забеспячэння бесперабойнай работы, прадастаўленні за кошт наймальніка 5 выхадных дзён у год па прычыне дрэннага самаадчування без афармлення бальнічнага ліста.

Сённяшняя сітуацыя пацвярджае, што галоўная матывацыя, каб людзі знаходзіліся ў прафсаюзе, — калектыўны дагавор. ФПБ адстаяла норму ў абноўленым працоўным кодэксе, каб калектыўны дагавор не распаўсюджваўся на ўсіх па заяўным прынцыпе. Рашайце пытанні ўключэння новага парадку распаўсюджвання норм калдагавору ў тарыфныя галіновыя, абласныя і раённыя дагаворы, у калектыўныя дагаворы.

Мы павінны разумець, што выхады з прафсаюзаў, стварэнні стачкамаў, забастоўкі, якія назіраліся на некаторых прадпрыемствах, — гэта дакладна спланаваныя, зрэжысіраваныя і падрыхтаваныя акцыі, накіраваныя на тое, каб падарваць эканоміку і дзяржаву ў цэлым. Наша задача ў гэтых умовах — знайсці падыход да кожнага чалавека. Забастоўка — гэта не выйсце. Мала хто з нас мае дадатковыя даходы, большасць жыве на зарплату. Губляць яе нельга. А таму трэба стабільна працаваць.

Спробы раскалыхаць сітуацыю будуць і далей. Нам патрэбны моцныя лідары, каб не дапускаць падобных з’яў.

Не ўсе разумеюць, што адбываецца ў краіне і ў нашым жыцці ў дадзены момант. Часцей сустракайцеся і гутарце з працоўнымі калектывамі, выслухоўвайце людзей і даносьце да іх нашу пазіцыю. Мы выступаем за захаванне таго, што краіна дасягнула за апошнія дзесяцігоддзі.

ФПБ прыняла адкрыты зварот, у якім заклікала ўсе бакі спыніць гвалт і не правакаваць канфлікты, каб захаваць мір у краіне.

Вы ведаеце, што ў нас заключаны пагадненні з шэрагам дзяржаўных органаў па асноўных напрамках работы. Гэта занятасць, зар-плата, цэны, ахова працы. Нягледзячы на ўсе аб’ектыўныя і суб’ектыўныя абставіны, людзі павінны працаваць у бяспечных умовах і атрымліваць грошы, якія зарабілі.

З прапановамі па ўнясенні змяненняў у Канстытуцыю краіны выступіла старшыня пярвічнай прафсаюзнай арганізацыі вагоннага дэпо Беларускага прафсаюза работнікаў транспарту і камунікацый Анжэла Касько. У прыватнасці, было прапанована падтрымаць дзеянне артыкула 5 Канстытуцыі па садзейнічанні, выяўленні і выказванні палітычнай волі грамадзян, удзельнічаючы ў выбарах, і забароне стварэння і дзейнасці грамадскіх аб’яднанняў, якія маюць мэтай гвалтоўнае змяненне канстытуцыйнага строю ці вядуць прапаганду вайны, сацыяльнай, нацыянальнай, рэлігійнай і расавай варожасці.

Заслухалі і іншых прафсаюзных актывістаў.

Савет райаб’яднання прафсаюзаў прыняў адпаведныя пастановы.