Добрыя навіны прынёс конкурс “Лепшыя тавары Рэспублікі Беларусь” 2022 года: сярод адзначаных прадуктаў ёсць і тыя, што зроблены ў Асіповічах працаўнікамі філіяла “Асіповіцкі” ААТ “Бабушкина крынка”.

Лепшымі ў сваіх намінацыях сярод навінак года прызнаны сыр “Чечил” вэнджаны касічка з масавай доляй тлушчу 45%, а таксама сырок “Весёлые внучата” з начынкай “КремаКолада” тлустасцю 23%.

Як расказалі на перапрацоўчым прадпрыемстве, “Чечил” пачалі вырабляць у ліпені. Раней вытворчасцю вэнджаных сыроў не займаліся. Таму, можна сказаць, гэта першы вопыт і адразу — удалы.

Са жніўня на лінейцы сырок з начынкай “КремаКолада”. Гэты прадукт, дарэчы, адразу прыйшоўся спажыўцам па гусце, таму, каб задаволіць існуючы попыт, і аб’ёмы яго адпаведныя. Мяркуйце самі: зараз такога віду глазураваных сыркоў выпускаецца 5-6 тон у месяц.