Бліжэйшыя месяцы стануць адметнымі для шэрагу працаўнікоў Асіповіцкага доследнага лясгаса: тры дзясяткі леснікоў зараз атрымліваюць спецыяльнасць “лесавод 3-га разраду”
Бліжэйшыя месяцы стануць адметнымі для шэрагу працаўнікоў Асіповіцкага доследнага лясгаса: тры дзясяткі леснікоў зараз атрымліваюць спецыяльнасць “лесавод 3-га разраду”
Стартавала вучоба на базе лесагаспадарчай установы 6 снежня. Заняткі праводзяць спецыялісты Мазырскага філіяла Цэнтра павышэння кваліфікацыі работнікаў лясной гаспадаркі.
Спачатку ўвага надаецца тэарэтычным ведам, што і лагічна, а з 28 снежня група прыступіць да практычных заняткаў. Працягнецца ж навучанне да 29 лютага, а ўжо ў першы дзень вясны “курсанты” здадуць кваліфікацыйны экзамен і атрымаюць адпаведныя пасведчанні.
Лесавод — гэта новы ўзровень прафесійных навыкаў. Па вялікім рахунку такі спецыяліст павінен ведаць аб лесе ўсё, пачынаючы ад таго, як правільна нарыхтоўваць пасадачны матэрыял драўнінных і хмызняковых парод, апрацоўваць яго, забяспечыць захаванне, потым з лепшага насення атрымаць, правільна высеяўшы, сеянцы і саджанцы ў гадавальніках, затым як іх правільна перасадзіць у адкрытую прастору, ажыццяўляць догляд за маладымі дрэўцамі. Калі ў агульным, лесавод сочыць за станам лясных угоддзяў, кантралюе рацыянальнае выкарыстанне лясных рэсурсаў і займаецца іх аднаўленнем.
Ну а тое, што асвойваюць спецыяльнасць далёка не навічкі ў лясной гаспадарцы, гарантуе паспяховую вучобу.
