Час і развіццё тэхналогій уносяць карэктывы ва ўсе сферы жыцця, у тым ліку ў кадравую палітыку прамысловых прадпрыемстваў: пакаленне зумераў (тых, што нарадзіліся ў перыяд з 1995 па 2010 гг.) не гарыць жаданнем станавіцца за станкі, аддаючы перавагу працы ў камфортным офісе або ўвогуле на “дыстанцыёнцы”. Таму перад прадпрыемствамі стаіць задача ўтрымліваць людзей умовамі працы, адносінамі ў калектыве і іншымі перавагамі.

Адзін з моцных бакоў ЗАТ “Асіповіцкі завод транспартнага машынабудавання” — кадравая палітыка. Як з пошукам і ўтрыманнем спецыялістаў спраўляюцца на заводзе, распавяла начальнік бюро па кадрах Алена Саўко.

— Сёння многія сферы адчуваюць недахоп кваліфікаваных рабочых рук. Якія спецыялісты зараз у дэфіцыце на АЗТМ?

— Да ліку найбольш запатрабаваных адносяцца электрагазазваршчыкі, слесары механазборачных работ, газарэзчыкі, а таксама інжынеры-тэхнолагі, інжынеры-канструктары, інжынеры-электронікі.

— Як ажыццяўляецца іх пошук?

— Размяшчаем аб’явы на сайце прадпрыемства, інфармацыйных парталах, у сацыяльных сетках, сродках масавай інфармацыі. На інфармацыйных стэндах і ў месцах масавага знаходжання работнікаў размешчаны аб’явы аб магчымасці працы ў якасці ўнутраных сумяшчальнікаў, а таксама атрымання дадатковых прафесій па кірунку асноўнай вытворчасці з наступным пераводам. На сустрэчах з калектывам пастаянна агучваецца просьба аб распаўсюджванні інфармацыі ў коле сваякоў, сяброў, знаёмых аб магчымасці працаўладкавання.

А яшчэ, так бы мовіць, працуем на апярэджанне. Актыўна карыстаемся сацыяльнымі сеткамі, якімі цікавіцца моладзь, вядзём шырокую прафарыентацыйную работу з навучэнцамі выпускных і профільных класаў школ горада, студэнтамі сярэдніх спецыяльных і вышэйшых навучальных устаноў: прымаем удзел у днях адчыненых дзвярэй профільных навучальных устаноў з прэзентацыяй арганізацыі і выпускаемай прадукцыі.

АЗТМ з’яўляецца базавым прадпрыемствам для Асіповіцкага дзяржаўнага каледжа, навучэнцы якога праходзяць у нас вытворчае навучанне і практыку, а пасля вяртаюцца на прадпрыемства ў якасці маладых спецыялістаў.

— Багацце спосабаў у барацьбе за спецыяліста ўражвае. А што чакае чалавека пасля працаўладкавання?

— Перш за ўсё, шырокія магчымасці для актуалізацыі наяўных і атрымання новых ведаў і навыкаў. Кожнаму “свежаму” супрацоўніку прызначаецца куратар, пад наглядам якога ён пачынае працу. Таксама арганізавана падрыхтоўка і перападрыхтоўка без адрыву ад вытворчасці па сумежных рабочых прафесіях, якія неабходныя прадпрыемству. Акрамя прафесійнага развіцця, АЗТМ прапануе работніку стабільныя сацыяльныя гарантыі: надбаўку за стаж працы на прадпрыемстве, выплату матэрыяльнай дапамогі на аздараўленне, да юбілейных дат, пры выхадзе на пенсію. Часткова пакрываюцца выдаткі на санаторна-курортнае лячэнне і аздараўленне дзяцей работнікаў у летні перыяд. У залежнасці ад стажу працы ў арганізацыі прадастаўляюцца дадатковыя дні працоўнага водпуску. Ёсць у завадчан і магчымасць скарыстацца трохдзённым сацыяльным адпачынкам па сямейна-бытавых прычынах з захаваннем сярэдняга заробку. У сацпакет таксама ўваходзіць добраахвотнае страхаванне медыцынскіх выдаткаў.

— Як працуе сістэма заахвочванняў прадукцыйных работнікаў?

— У прынятым на заводзе Палажэнні аб прэміраванні прапісаны крытэрыі ацэнкі асабістага ўкладу кожнага ў дасягненні мэт арганізацыі. Перадавікі, акрамя грашовага заахвочвання, узнагароджваюцца каштоўнымі падарункамі, падзякамі, ганаровымі граматамі, фота размяшчаецца на Дошцы гонару. Таксама для завадчан прадугледжаны выплаты да прафесійных свят і іншых святочных дзён.

— Падвядзём вынікі. Якія перавагі дае падобны падыход да кадравага пытання ў дзейнасці прадпрыемства?

— Руплівасць завадчан дазволіла завяршыць 2024 год з выбітнымі паказчыкамі. Прадпрыемства атрымала ўзнагароду ад свабоднай эканамічнай зоны Магілёў за дасягненне высокіх экспартных вынікаў, а правільнасць кадравай работы пацвердзілася Падзячным пісьмом Магілёўскага аблвыканкама за стварэнне працоўных месцаў з высокім узроўнем заробку.