Яе работнікі захоўваюць у належным стане 516 км чыгуначных пуцей, у тым ліку больш за 100 км бесстыкавых, 93 пераезды, 68 мастоў (11 металічных, 57 жалезабетонных і два пешаходныя), 578 стрэлачных пераводаў, а таксама 73 вытворчыя і службова-бытавыя будынкі.

Дыстанцыя абслугоўвае чатыры галоўныя напрамкі — Асіповічы-Слуцк-Салігорск, Асіповічы-Магілёў, Асіповічы-Мінск і Верайцы-Градзянка.

Размешчана ў шасці раёнах Мінскай і Магілёўскай  абласцей. Аб’ядноўвае          19 станцый, тры з якіх вузлавыя. Сярэдняя груза-напружанасць за мінулы год склала 16,47 млн ткм/год, што амаль на 2 млн больш, чым летась.

Такая “гаспадарка” патрабуе пастаяннай увагі: летась быў выкананы ўзнаўленчы рамонт на адрэзках пуці Дзераўцы-Дараганава і Слуцк-Калій-3, прычым часткова — на новых матэрыялах з укладкай новых рэек. Заменены два камплекты стрэлачных пераводаў, 14 пераводаў перанеслі з драўлянай на жалезабетонную аснову. Атрымана і ўкла-дзена больш за тры тысячы жалезабетонных і амаль пяць тысяч драўляных шпал. За мінулы год была заменена 61 вострадэфектная і 427 дэфектных рэек. З дапамогай сучаснага комплексу TRANSLAMATIK узноўлена 223 дэфектныя рэйкі і наплаўлена 50 крыжавін.

Поспех любога прадпрыемства магчымы толькі пры наяўнасці надзейнай, працаздольнай і высокакваліфікаванай каманды. І такая ў дыстанцыі пуці ёсць! Сёння ў ПЧ-15 працуе 415 чалавек. Нямала пуцейцаў адзначана галіновымі ўзнагародамі. Напрыклад, начальнік пуцявой машыны Сяргей Каліноўскі нядаўна атрымаў Ганаровую грамату Міністэрства транспарту і камунікацый. Нагрудным знакам “За добрасумленную працу на Беларускай чыгунцы” ІІ і ІІІ ступені адпаведна адзначаны брыгадзір Сяргей Хацько і электрагазазваршчык Васілій Ізмер. Дарэчы, майстар участка дэфектаскапіі Ілля Маісееў і рамонтнік штучных збудаванняў Аляксандр Емельянаў на конкурсе Магілёўскага аддзялення “Лепшы па прафесіі на чыгуначным транспарце”, які прайшоў у мінулым месяцы, занялі ганаровыя першыя месцы.

Па словах начальніка дыстанцыі пуці Аляксандра Еўдакімовіча, прыклад у працы паказвае Яўгеній Старкоў, які прайшоў шлях ад манцёра пуці да начальніка вытворчага ўчастка. Перспектыўным работнікам з актыўнай жыццёвай пазіцыяй называюць брыгадзіра Ягора Шатохіна — члена Маладзёжнага парламента пры райсавеце дэпутатаў. Дарэчы, кіраўніцтва дыстанцыі робіць усё для прыцягнення кадраў і замацавання маладых спецыялістаў: дапамагае рашыць жыллёвую праблему, выдае мэтавыя накіраванні ў профільныя навучальныя ўстановы. Летась на базе ПЧ-15 працаваў студэнцкі атрад з ліку навучэнцаў каледжа. Гэта практыка будзе працягнута.

Словам, перспектывы ў дыстанцыі ёсць, вопыт за 150 гадоў напрацаваны, калектыў разумее адказнасць, а таму асіповіцкім чыгуначнікам любая задача па плячы.