Асіпаўчане ведаюць, што дэпутат Палаты прадстаўнікоў Нацыянальнага сходу краіны Святлана Шутава штомесяц праводзіць у райцэнтры ці сельсаветах прыём грамадзян і прамую тэлефонную лінію, наведвае працоўныя калектывы, удзельнічае ў розных мерапрыемствах. Не стаў выключэннем і люты.

Пра ўдзел Святланы Аляксандраўны разам з кіраўніцтвам рэгіёна ў мітынгу-рэквіеме на Алеі Герояў з нагоды 34 гадавіны вываду савецкіх войскаў з Афганістана і сустрэчы з членамі райарганізацыі “Беларускі саюз ветэранаў вайны ў Афганістане” і сем’ямі загінуўшых воінаў у  СШ-1 раёнка ўжо паведамляла, але праца парламентарыя ў рэгіёне на гэтым не скончылася.

Уранку член Пастаяннай камісіі па дзяржаўным будаўніцтве, мясцовым самакіраванні і рэгламенце правяла прыём землякоў, якія пажадалі мець зносіны з ёй вочна. І яны далёка не заўсёды ўздымалі пытанні мясцовага маштабу.

Станіслаў Лукашэвіч, напрыклад, агучыў надзею людзей сталага ўзросту наконт выплат дзяржавы па “савецкіх” укладаннях: назапашваемыя многімі на банкаўскіх рахунках грошы фактычна “згарэлі”, працоўныя паўнацэнныя рублі-чырвонцы ператварыліся ў нікчэмныя рэшткі, нейкія капейкі. А хіба просты чалавек вінаваты ў тым, што адбылося? Калі ж і кім будуць вернуты пакрыўджаным страчаныя сродкі?

І яшчэ адна праблема хвалюе жыхара Вяззя: непрызнаны гераізм. Узгадваючы тэму генацыду беларускага народа, ветэран педагагічнай працы лічыць, што мы павінны аддаць заслужаную шану не толькі тым, хто ў гады ваеннага ліхалецця ратаваў яўрэяў, а не забыцца адзначыць і тых, хто рызыкаваў жыццём, хаваючы ад фашысцкіх катаў дзяцей іншых нацыянальнасцей: яны таксама варты высокага звання “Праведнік народаў свету”.

15 лютага праваслаўныя адзначылі Стрэчанне Гасподняе. Гэтае двунадзясятае свята ад-крыла падрыхтоўку да Вялікага посту, які сёлета пачнецца 27 чысла, і Святлана Шутава ў другой палове серады наведала знакавае для Асіповіччыны месца — Прошчу. Год таму прыход быў ператвораны ў мужчынскі манастыр у гонар іконы Божай Маці “Жываносная крыніца”, і яго настаяцель ігумен Максім падрабязна расказаў парламентарыю і старшыні райсавета дэпутатаў Сяргею Сувееву пра жыццё манастырскага падворка ў в. Карытнае і Асіповічах, паказаў усю сённяшнюю гаспадарку Прошчы, манаскага братэрства.

Віталь КУЛАКОЎ.