АЗЖБК сапраўды заслугоўвае права называцца адным з самых стабільных прадпрыемстваў рэгіёна. З аднаго боку, трываласць абумоўлена характарам яго дзейнасці, паколькі прадукцыя з жалезабетону заўсёды ў попыце, а тут выпускаецца практычна ўся наменклатура вырабаў для будаўніцтва прамысловых і грамадзянскіх збудаванняў, транспартнай інфраструктуры і дарожнага будаўніцтва. З другога — вырабы прадпрыемства адрозніваюцца вышэйшай якасцю, таму займаюць дастойнае месца на айчынным рынку будматэрыялаў. I АЗЖБК у чарговы раз увайшоў у лік лідараў раёна па выкананні паказчыкаў прагнозу сацыяльна-эканамічнага развіцця.

Юбілейны год (у мінулым завод адсвяткаваў 50-годдзе) быў досыць прадукцыйным. У дадатак да ўжо наяўных 1 500 вырабаў завод асвоіў вытворчасць новай прадукцыі. Асартымент пашырыўся камплектамі жалезабетонных брусоў стрэлачных пераводаў тыпу Р65 маркі 1/6 і падкладак для стрэлачных пераводаў тыпу Р65 марак 1/6 і 1/11.

На прадпрыемстве выпусцілі прадукцыю на 71,1 мільёна рублёў. Гэта 48,1 тыс. м3 шпал і жалезабетонных брусоў для стрэлачных пераводаў, 9,4 тыс. м3 элементаў добраўпарадкавання (тратуарная плітка і бардзюры) і 550 тон металаканструкцый. Такім чынам тэмп росту прамысловай прадукцыі ў фактычных адпускных цэнах саставіў 106,84%, што на 6,34% больш, чым за 2023 год.

Заводам дасягнуты добрыя вынікі па рэалізацыі прадукцыі на экспарт: выручка перавышае $3 млн. Асноўным спажыўцом вырабаў завода за мяжой застаецца Расія.

Землякі таксама аддаюць перавагу прадукцыі мясцовай вытворчасці. Шмат дзе ў горадзе можна ўбачыць тратуарную плітку АЗЖБК, акрамя гэтага, завод з’яўляўся асноўным пастаўшчыком таварнага бетону і элементаў добраўпарадкавання для будаўніцтва галоўнага аб’екта 2024 года ў горадзе — сярэдняй школы № 5.

Па заканамерным ланцужку “расце вытворчасць — расце прыбытак” павялічыўся і заробак работнікаў, якіх зараз нямала — 400 чалавек. У параўнанні з 2023 годам тэмп росту склаў 128,6%, што сведчыць аб павышэнні дабрабыту спецыялістаў.

АЗЖБК працягвае развівацца і ўдасканальвацца, укараняючы сучасныя тэхналогіі і паляпшаючы канкурэнтаздальнасць прадукцыі. Наперадзе — новыя дасягненні і поспехі, якія будуць спрыяць далейшаму ўмацаванню пазіцый на рынку і павышэнню дабрабыту работнікаў.