Тамара Цывінская шмат гадоў працавала ў філіяле «Асіповіцкі» ААТ «Бабушкина крынка» аператарам расфасовачна-упаковачнага аўтамата, а затым сыраробам. Але на прадпрыемстве яе ведаюць не толькі як сапраўднага прафесіянала, але і як чалавека, які выратаваў не адно жыццё. Тамара Васільеўна ўжо некалькі дзясяткаў гадоў з’яўляецца донарам крыві.

Калісьці ў пачатку яе прафесійнага шляху на прадпрыемства прыязджала медыцынская брыгада, якая прапанавала работнікам здаць кроў. Тамара без асаблівых разважанняў згадзілася, ра­зумеючы, як важна бывае дапамога людзям, якія трапілі ў няпростую сітуацыю. І з той пары не перарывае гэту высакародную дзейнасць.

Зараз Тамара Васільеўна ўжо не наведвае Бабруйскую занальную станцыю пералівання крыві кожныя тры месяцы, як раней, але ёй нярэдка тэлефануюць: «Тэрмінова патрэбна кроў вашых параметраў». Тады жанчына кідае ўсе справы і ляціць у суседні райцэнтр, бо ведае, што справа не церпіць прамаруджвання.

Узгадвае цікавыя выпадкі са сваёй біяграфіі. Аднойчы 8 сакавіка ў яе зазваніў тэлефон. Незнаёмы мужчынскі голас папрасіў аб сустрэчы. «Вы мая выратавальніца», — такімі словамі пачаў гутарку нечаканы візіцёр, які прыйшоў з кветкамі і словамі ўдзячнасці. Аказваецца, аднойчы яе кроў выратавала гэтага чалавека. Такія моманты запамінаюцца на ўсё жыццё. Як і тыя, калі ў медустанову дастаўляюць вялікую колькасць пацярпелых ад аварыі і тэрмінова выклікаюць, бо патрабуецца шмат крыві.

Тамара ўзнагароджана нагрудным знакам «Ганаровы донар Рэспублікі Беларусь» (уручаецца людзям, якім праведзена 40 данацый). Яна ж мае значна большую колькасць.

Наша гераіня актыўна прапагандыруе донарства сярод знаёмых і родных. Некаторыя бяруць з яе прыклад. Марыць аб далучэнні да донарскай суполкі і ўнучка Мілана, з гэтай нагоды асабліва чакае паўналецця. Бабуля падтрымлівае жаданне дзяўчынкі дапама­гаць людзям.

«Мы з табой адной крыві» — гэтыя словы для нашай гераіні не проста вядомы выраз. Іх яна можа адрасаваць многім землякам, якім дала шанц на жыццё.

Іна Заскевіч