Што для Андрэя Векі дэпутацкая работа? Перш за ўсё — кантакт з людзьмі, магчымасць даносіць да іх неабходную інфармацыю. Жыць даводзілася ў розных месцах, таму прызвычаіцца да новых умоў можа даволі лёгка. Стасункі з землякамі ён любіць, у чым пераканаўся ў чарговы раз на новай грамадскай пасадзе.

Чые інтарэсы абараняе? Жыхароў некалькіх вуліц рабочага пасёлка, а таксама вёсак Свіслацкага сельсавета, якія размешчаны на тэрыторыі СВК “Калгас “Бярэзіна” — Краснага, Буды, Копчы, Сталяроў і іншых.

Дзе сустракаецца з народам? У завадскіх карпусах, сельскім Доме культуры, проста на вуліцы — месца не мае ніякай ролі, было б што абмеркаваць.

З чым ідуць да свайго выбранніка? З праблемамі, якія хвалююць: не гарыць святло на вуліцы; адсутнічаюць тратуары, патрабуецца рамонт дарог; не задавальняе якасць вады…

Як прадстаўнік выбарнага органа ўлады садзейнічае ў вырашэнні праблемных пытанняў? Даносіць іх да старшыні раённага Савета дэпутатаў, а той звяртаецца ў адпаведныя арганізацыі. Часцей за ўсё праблемы здымаюцца. Пытанні ж мясцовага характару вырашаюцца ва ўзаемадзеянні са Свіслацкім і Ялізаўскім сельвыканкамамі.

Што засмучае дэпутата? Адсутнасць у пасёлку ачышчальных збудаванняў, што адбіваецца на стане навакольнай прыроды: сцёкі трапляюць у раку, падсыхаюць асілкі-дубы…

Аб чым мараць жыхары Ялізава і навакольных вёсак? Аб уласным магазіне будаўнічых матэрыялаў. Каб газавікі пасля праведзеных работ узнаўлялі парушанае асфальтавае пакрыццё. Бацькі — каб у Красным быў абсталяваны прыпынак для школьнага аўтобуса. Жадаюць мець зімовы каток для канькабежцаў і летні для аматараў ролікавых канькоў. А яшчэ каб усе наказы, з якімі звяртаюцца да дэпутата, вырашаліся хутка, як у казцы.

Як Андрэй адносіцца да пасёлка? Як да жывой істоты: лёс праходзіць праз душу і сэрца, таму і адчуваецца боль ад яго бед. Нягледзячы на цяжкасці, звязаныя са становішчам шклозавода, спецыяліст не збіраецца нікуды з’язджаць. Спа-дзяецца, што яго веды і вопыт яшчэ спатрэбяцца прадпрыемству, якое стала родным. А пасада галоўнага канструктара дае магчымасць прынесці новыя ідэі і рашэнні. Ён згодзен рабіць усё магчымае, каб забяспечыць прадпрыемству светлую будучыню.

Што дае дэпутацтва? Магчымасць паглядзець на многія рэчы пад рознымі вугламі, стаць больш талерантным, удумлівым.

У што верыць? У сваіх землякоў, калег. I ў тое, што зможа самарэалізавацца. У прафесіі, сям’і, грамадскай дзейнасці.