История Свислочской школы началась в 1848…
Гісторыя ДУА “Свіслацкая сярэдняя школа” пачалася ў далёкім 1848 годзе дзякуючы шчодрасці пана Незабытоўскага, які пабудаваў у тагачасным мястэчку аднакласную царкоўна-прыходскую школу. З тае пары ўстанова перацярпела мноства рэарганізацый, але якасная адукацыя заставалася для яе прыярытэтам.
Пра вучняў
— Сёння ў нас навучаецца 79 дзяцей са Свіслачы і бліжэйшых вёсак: Вуглаты, Слабады, Вязаўніцы і Вязычына, — распавядае дырэктар школы Антаніна Фралова. — Аднак гэтая лічба тычыцца толькі пастаяннага кантынгенту школьнікаў. Штомесяц да яе дадаецца і розная колькасць вучняў, якія прыязджаюць на аздараўленне ў дзіцячы санаторый “Свіслач”.
Пра навучальны працэс і поспехі
— Вучні тут ніколі не застаюцца без справы. Пасля заняткаў іх чакаюць аб’яднанні па інтарэсах разнастайных напрамкаў, спартыўныя секцыі і прадметныя факультатывы, спіс якіх сфарміраваны па выніках анкетавання. Школьныя суботы таксама праходзяць весела і карысна: перанесены некаторыя факультатывы, наведванне басейна, экскурсіі па раёне. Ёсць і свае традыцыі: кожны навучальны год пачынаецца і заканчваецца вялікім спартыўным святам. Асаблівымі поспехамі ў алімпіядных спаборніцтвах тутэйшыя навучэнцы, на жаль, пахваліцца не могуць. Аднак добры ўзровень ведаў вучні дэманструюць у дыстанцыйных унутрышкольных віктарынах і конкурсах. Не падводзяць і выпускнікі. Сёлета 6 чалавек з 14 паступілі ў ВНУ, астатнія абралі рабочыя спецыяльнасці. Плённа працуе школа на творчай ніве. У мінулым навучальным годзе па выніках абласнога этапу рэспубліканскага творчага праекта для падлеткаў “Бяспечны пераход-2017” Дыпломам III ступені была ўзнагароджана Кацярына Клепча, а Раман Данільчык заняў 2 месца ў раённым конкурсе “Залатое пяро “Белай Русі”, прысвечаным 145-годдзю Асіповічаў. Гэты год таксама пачаўся з перамогі. Канал на відэахостынгу YouTube дапамог школе атрымаць Дыплом I ступені ў намінацыі “Аўтарская канцэпцыя” конкурсу сайтаў устаноў адукацыі “Сайт установы адукацыі як рэсурс выхаваўчай работы”.
Пра настаўнікаў
— Адукацыйны працэс забяспечваюць вопытныя работнікі. Увесь педагагічны калектыў, які складаецца з 32 настаўнікаў, навучае дзяцей зменнага і пастаяннага кантынгенту. Аналіз узроставага складу сведчыць аб тым, што ў школе ў большасці працуюць настаўнікі самага працаздольнага ўзросту: каля 43 гадоў. Калектыў вызначаецца высокай стабільнасцю: цякучасць кадраў за апошнія пяць гадоў складае ўсяго 4%. Ёсць сярод педагогаў тыя, хто аддаў школе шмат гадоў і паказвае высокія вынікі ў прафесійнай дзейнасці. Ала Данільчык, Эліна Жалабковіч, Святлана Губар штогод падрыхтоўваюць вучняў да ўдзелу ў алімпіядах, конкурсах рознага ўзроўню. Няблага паказваюць сябе і маладыя спецыялісты.
Пра будучыню
Школа ставіць перад сабой рэальныя планы: развіццё YouTube-канала, павышэнне якасці ведаў вучняў, добраўпарадкаванне тэрыторыі і будынка ўстановы. Прынамсі, невялікая Свіслацкая школа ў рэйтынгу 20 устаноў школьнай адукацыі займае пятае месца. Зусім неблагое дасягненне, абапіраючыся на якое можна смела ісці далей.