…атрымаў кожны ўдзельнік клуба педагагічных сустрэч, пасяджэнне якога традыцыйна адбылося напярэдадні жаночага свята. Мерапрыемства можна назваць шматфункцыянальным: у сабраўшыхся ва ўтульнай зале РЦК была магчымасць даведацца навіны з жыцця педагагічнага асяродка — пэўныя звесткі ўваходзілі ў сцэнарый, сустрэць калег з розных устаноў адукацыі Асіповіччыны і атрымаць асалоду ад святочнага канцэрта.

Вітаючы педагогаў, намеснік старшыні райвыканкама Аляксандр Шаўлюга падзяліўся меркаваннем, што ўсё самае цудоўнае на зямлі звязана з жанчынамі — сімваламі дабрыні, любові і пяшчоты. Менавіта яны — стваральнікі гармоніі і спакою. Гэтую ж думку працягнулі ў сваіх віншаваннях начальнік аддзела адукацыі, спорту і турызму райвыканкама Наталля Шаўчэнка і старшыня раённай арганізацыі беларускага прафсаюза работнікаў адукацыі і навукі Алена Кулакоўская.

Сустрэча ў клубе была добрай нагодай, каб сказаць словы падзякі лепшым працаўнікам педагагічнай нівы, прычым не толькі жанчынам. Граматы Міністэрства адукацыі атрымалі настаўнікі Галіна і Аляксандр Быкавы з Ялізава, Андрэй Лянчэўскі з гарадской СШ № 2. Ганаровымі граматамі ўпраўлення адукацыі Магілёўскага аблвыканкама ўзнагароджаны Марына Харытонава з гімназіі, Ніна Лапікава з Вяззеўскай СШ, дырэктар СШ № 3 Анатоль Шчамялёў, метадысты аддзела адукацыі Вольга Кур’яновіч і Алена Хадакоўская, педагогі СШ № 2 Людміла Бабакова, Людміла Смірнова, Людміла Цвірко і Наталля Шчарбачэня. Ганаровыя граматы райвыканкама атрымалі намеснікі дырэктараў Алена Міхайлоўская і Кацярына Свіркова з Каменіцкага ВПК і СШ № 2 адпаведна. Шэраг педагогаў адзначаны Ганаровымі граматамі, граматамі і падзячнымі лістамі аддзела адукацыі, спорту і турызму райвыканкама, таксама абласнога і раённага камітэтаў галіновага прафсаюза. Нагрудным знакам Міністэрства адукацыі “Выдатнік адукацыі” ўганараваны дырэктар Пратасевіцкай СШ Мікалай Бранавіцкі.

Асаблівую ўвагу атрымалі ўдзельнікі рэспубліканскага конкурсу прафесійнага майстэрства “Настаўнік года Рэспублікі Беларусь-2014”. Тыя, хто паказаў лепшыя вынікі на раённым этапе, у гэты час якраз абаранялі гонар Асіповіччыны ў вобласці.

Канцэртная праграма была складзена такім чынам, каб зрабіць сустрэчу максімальна насычанай. Вядучыя спрабавалі разгадаць сакрэт сучаснай жанчыны, ім дапамагалі сваімі песнямі і танцамі самадзейныя артысты. Асаблівае замілаванне выклікаў дэбют выхаванцаў дзіцячага ясляў-сада № 11 “Зорачка”: маленькія джэнтльмены падарылі гледачам яркае і эмацыянальнае віншаванне. З цікавай прэзентацыяй сваёй работы выступіла суперфіналіст абласнога конкурсу “Педагог дадатковай адукацыі”, кіраўнік узорнай студыі “Цуд” ЦТДіМ Святлана Пацкевіч.

Запрашаліся на сцэну для віншаванняў і размовы настаўніцы, якія маюць трох і болей дзяцей. Ад грамадскага аб’яднання “Белая Русь” атрымалі каштоўныя падарункі жанчыны, якія выхоўваюць прыёмных хлопчыкаў і дзяўчынак. Ну і, безумоўна, шчодрым было мерапрыемства на кветкі і ўсмешкі.

Разыходзіліся ўсе ў добрым настроі і з упэўненасцю, што наступіўшая вясна і жаночае свята падораць яшчэ нямала радасных хвілін.

Валянціна КОРБАЛЬ. Фота Ніны ЦАРЫК.