Днямі ў РЦК адбылася сустрэча, прысвечаная Дню настаўніка

Традыцыйна ў першую нядзелю верасня вітаюць педагогаў — людзей, якія сеюць разумнае, добрае, вечнае. Дзе б яны ні працавалі — у школах, дзіцячых садах, пазашкольных установах, — гэтыя людзі фарміруюць грамадства будучага, укладаючы ў выхаванне і развіццё падрастаючага пакалення часцінку сваёй душы.

Працаўнікоў педагагічнай нівы віталі старшыня раённага Савета дэпутатаў Сяргей Сувееў, начальнік аддзела па адукацыі райвыканкама Ірына Сяргейчык, кіраўнік раённага камітэта прафсаюза работнікаў адукацыі і навукі Марына Гірэнка і іншыя. Акрамя цёплых слоў, многія работнікі галіны атрымалі заслужаныя ўзнагароды і кветкі. Граматы Міністэрства адукацыі краіны былі ўручаны настаўніку Вяззеўскай школы Алене Гаўруковіч, метадысту раённага цэнтра творчасці дзяцей і моладзі Ліне Бахаравай, загадчыку аддзела РЦТДіМ Ганне Бабчанок, намесніку загадчыка па асноўнай дзейнасці дашкольнага цэнтра развіцця дзіцяці Святлане Торвінен, загадчыку дзіцячага сада № 6 Алене Ясакавай. Граматамі Галоўнага ўпраўлення па адукацыі аблвыканкама ўзнагароджаны настаўнік Пратасевіцкай школы Вольга Балтушка, музычны кіраўнік АДЦРР Ліяна Галубовіч, настаўнік Свіслацкай СШ Ала Данільчык, выхавальнік дзіцячага сада № 8 Таміла Кавальчук, настаўнік СШ № 1 Надзея Рэкіш, намеснік дырэктара Вяззеўскай школы па выхаваўчай рабоце Інга Рогаль, намеснік дырэктара па вучэбнай рабоце СШ № 2 Ала Пунчанка, настаўнік гімназіі Таццяна Цяслёнак. Шэраг работнікаў устаноў адукацыі атрымалі Ганаровыя граматы раённага Савета дэпутатаў і Падзячныя лісты яго старшыні, Ганаровыя граматы і Падзячныя лісты аддзела па адукацыі райвыканкама. Былі адзначаны і актыўныя ўдзельнікі прафсаюзнага руху.

Не засталіся па-за ўвагай ветэраны педагагічнай працы. Напярэдадні Дня пажылых людзей яны атрымалі віншаванні, падзяку за шматгадовую сумленную працу. Віталі ўдзельнікі сустрэчы таксама бацькоў-выхавальнікаў, якія саграваюць сэрцайкі дзяцей, што засталіся без апекі родных бацькоў. У раённым этапе конкурсу “Сэрца аддаю дзецям” пераможцай стала сям’я Дарашэнкаў, якая была адзначана Падзячным лістом аддзела па адукацыі райвыканкама. Апладысментамі сустрэлі педагогі маладых спецыялістаў, якія папоўнілі ў жніўні працоўныя калектывы.

Усе, хто быў удастоены гонару прысутнічаць на прафесійным фэсце, атрымалі музычныя падарункі і шмат станоўчых эмоцый.