Знаёмцеся

Дырэктар ДУА “Сярэдняя школа № 1 г. Асіповічы імя Б.М. Дзмітрыева” Алена Паргачова

Нарадзілася ў 1975 годзе ў г. Асіповічы. Пасля заканчэння СШ № 2 паступіла ў Віцебскі дзяржаўны ўніверсітэт імя П.М. Машэрава. Атрымаўшы дыплом, два гады працавала настаўнікам малявання, чарчэння і сусветнай мастацкай культуры ў гімназіі.

З 2000 года — інжынер-канструктар ЗАТ “Алцімед”. Тут спатрэбіліся тэхнічныя ўменні, атрыманыя ў гады вучобы. Тэхналагічны працэс захапіў, і, імкнучыся авалодаць новымі ведамі, Алена Аляксандраўна дэталёва яго вывучала, нават займалася распрацоўкай мадэлі сардэчнага клапана.

У 2006 годзе Паргачову прызначаюць дырэктарам дзіцячай мастацкай школы мастацтваў. За гады яе працы было створана 2 філіялы, вырас кантынгент навучэнцаў, вялікі працэнт якіх, захапіўшыся творчасцю, працягнуў вучобу ў сярэдніх спецыяльных і вышэйшых навучальных установах.

З 2015-га была кіраўніком раённага аб’яднання арганізацый прафсаюзаў, якія ўвахо-дзяць у Федэрацыю прафсаюзаў Беларусі. На Асіповіччыне зараз функцыянуе больш за 150 прафсаюзных арганізацый, якія згуртавалі звыш 15 тысяч чалавек, і на сваёй папярэдняй пасадзе Алена Аляксандраўна значна ўмацавала структуру. Асіповіцкае райаб’яднанне занесена на Дошку гонару Магілёўскага абласнога аб’яднання прафсаюзаў.

Сёння — новае месца працы і грандыёзныя планы. Сярэдняя школа № 1 згодна з вынікамі раённага спаборніцтва па сацыяльна-эканамічным раз-віцці за 2020 год выйшла ў лідары. Гэты факт новаму дырэктару надае асаблівай адказнасці: дасягнуты ўзровень зніжаць нельга. Алена Аляксандраўна мае шмат цікавых ідэй па ўзаемадзеянні з педагогамі, вучнямі і іх бацькамі. Сучасны навучальна-выхаваўчы працэс патрабуе не толькі рознабаковай дасведчанасці, але і ўмення наладжваць камунікацыі, што ў таленавітага кіраўніка заўсёды добра атрымлівалася.

Зараз школа актыўна рыхтуецца да 2021/2022 навучальнага года: ажыццяўляецца рамонт фае, гардэроба. Ідзе замена амаль сотні вокнаў. Іншы выгляд набудзе школьны ганак, які ўжо менш чым праз месяц сустрэне вучняў, а іх тут найбольшая колькасць у раёне — звыш 1 100.

“Ісці наперад смела” — такое жыццёвае крэда ў дырэктара Паргачовай. Яна пераканана, што яе праца ва ўстанове адукацыі дазволіць раскрыцца новаму патэнцыялу. Крыніцы яе жыццёвай энергіі не толькі сын Павел, дачка Карына, унучка Анюта, але і жаданне ствараць і прыносіць карысць грамадству і роднай краіне.