На прасторы жыцця!

Завяршыўся чарговы навучальны год, апошні акорд якога на Асіповіччыне прагучаў пазаўчора: выпускнікам былі ўручаны дакументы аб заканчэнні сярэдняй школы

268 юнакоў і дзяўчат развіталіся са школьнымі партамі назаўсёды, каб далей развіваць свой патэнцыял у сярэдніх спецыяльных і вышэйшых навучальных установах або прыступіць да працы ў адной з галін народнай гаспадаркі.

Некаторыя з рабят не толькі атрымалі атэстаты аб сярэдняй агульнай адукацыі, але і былі адзначаны медалямі. Сёлета ва ўмовах забароны масавых мерапрыемстваў каштоўныя ўзнагароды выпускнікам уручалі ў сваіх альма-матар.

У святочны дзень журналісты “раёнкі” наведалі СШ № 2, якая стала пераможцай па колькасці медалістаў. Нягледзячы на тое што мерапрыемства праходзіла без прысутнасці бацькоў, іншых родных і сяброў выпускнікоў, атмасфера была па-сапраўднаму ўрачыстай. Святочна прыбранае фае, музыка, сур’ёзны выгляд хлопцаў, прыгожыя ўборы дзяўчат…

36 вучняў атрымалі тут пуцёўкі ў дарослае жыццё. З паспяховым заканчэннем школы рабят павіншавалі дырэктар Андрэй Лянчэўскі, іншыя педагогі, а ўдзельнікі свята з задавальненнем паглядзелі відэасюжэты аб школьным жыцці. Памяць аб ім застанецца ў сэрцах назаўсёды.