Падзея

Ведаў шмат не бывае

Прыемна чуць, што землякі час ад часу ўзнагароджваюцца за спартыўныя дасягненні або творчыя выступленні. Усё больш матуль атрымліваюць ордэн Маці. А ёсць яшчэ адна ўзнагарода — залаты медаль, які ўручаецца за якасныя веды. Ім штогадова заахвочваюць лепшых выпускнікоў устаноў сярэдняй адукацыі. Сёлета такіх 15. “Залатыя” рабяты пазаўчора прымалі віншаванні з гэтай прыемнай нагоды. Медалі ім уручыў старшыня раённага выканаўчага камітэта Канстанцін Жыгуцкі.

Трывалыя веды замацавалі медалямі вышэйшага гатунку гімназісты Кацярына Палілей і Паліна Пінчук, выпускнікі СШ № 1 Андрэй Сугака, Анастасія Аляксандрова і Сцяпан Баршчэнка, а таксама Максім Дубінчык і Лізавета Арэхава з СШ № 2, Марына Балобіна і Аляксандра Жытнякоўская з СШ № 4. Выпускнікі сельскіх школ не адсталі ад сваіх гарадскіх аднагодкаў. Залатыя медалі атрымалі ялізаўчанка Юлія Латц, выпускніцы Жорнаўскай СШ Валерыя Сомчанка, Лапіцкай — Вераніка Карманава і Сафія Чорная, Свіслацкай — Анастасія Шынкевіч, Ліпенскага ВПК дзіцячы сад-СШ Кацярына Астравух.

Падзячныя пісьмы райвыканкама і віншаванні атрымалі і бацькі рабят-медалістаў, якія падтрымлівалі сваіх сыноў і дачок на працягу ўсяго іх доўгага шляху па прыступках ведаў, а Падзячныя пісьмы аддзела па адукацыі райвыканкама былі ўручаны класным кіраўнікам і дырэктарам устаноў адукацыі. Кіраўнікі школ выступілі з кранальнымі прэзентацыямі сваіх “залатых” выпускнікоў, у ходзе якіх не проста расказалі пра поспехі і дасягненні, захапленні і мары, але і ад усёй душы жадалі шырокіх даляглядаў, светлых перспектыў і выказвалі спадзяванні на далейшую сувязь з альма-матар.

Тое, што ў школ Асіповіччыны надзейныя перспектывы, пацвердзіла агучванне дасягненняў вучняў школ у рэспубліканскім конкурсе работ даследчага характару, заключным этапе рэспубліканскай алімпіяды па вучэбных прадметах. Дзесяцікласнік СШ № 4 Мікіта Куліш атрымаў Дыплом ІІ ступені на рэспубліканскай алімпіядзе па працоўным навучанні, выпускнік той жа школы Данііл Сантоцкі стаў пераможцам конкурсу работ даследчага характару па англійскай мове, дзесяцікласніца з гімназіі Наталля Ганчарова атрымала Дыплом ІІ ступені на алімпіядзе па прадмеце “Фізічная культура і здароўе”. Выпускнік Каменіцкага ВПК Міхаіл Шкурын стаў пераможцам ХХХІ рэспубліканскага конкурсу навуковых біёлага-экалагічных работ навучэнцаў, двойчы стыпендыятам спецыяльнага фонду Прэзідэнта краіны па сацыяльнай падтрымцы адораных вучняў і студэнтаў. Бацькі і педагогі таленавітых вучняў таксама былі заахвочаны. Асаблівыя словы падзякі прагучалі ў адрас намесніка дырэктара Каменіцкай установы адукацыі Алы Шалыпінай, якая выгадавала 6 стыпендыятаў спецыяльнага фонду Прэзідэнта.

У гэтыя дні дзясяткі выпускнікоў назаўсёды развіталіся са сваімі школамі. Хтосьці атрымаў залаты медаль, а большасць — звычайныя атэстаты сталасці. Кожны з рабят намеціў для сябе далейшую дарогу. Няхай жа ўсе іх мары і задумкі спраўдзяцца!