Спрыяльныя ўмовы для дзяцей — галоўнае ў дашкольнай установе.

— Вельмі важна ў дашкольным узросце сфарміраваць у дзяцей базу ведаў і практычных навыкаў здаровага ладу жыцця, — лічыць загадчык ясляў-сада № 9 “Крынічка” Вольга Русаковіч. — Педагогі нашай установы забяспечваюць захаванне распарадку дня: асабістую і выхавальніцкую накіраванасць усіх бытавых працэсаў, чаргаванне спакойных і актыўных відаў дзейнасці, уключэнне практыкаванняў па авалодванні гігіенай і культурай паводзін. Пры правільным і строгім выкананні распарадку дня выпрацоўваецца выразны рытм функцыянавання арганізма. А гэта стварае найлепшыя ўмовы для працы і аднаўлення, спрыяе ўмацаванню здароўя.

У дашкольным узросце таксама вялікая роля адводзіцца харчаванню. Яно арганізавана на аснове прыкладнага двухтыднёвага меню, распрацаванага з улікам патрабаванняў Санітарных норм і правілаў для адпаведных відаў устаноў дашкольнай адукацыі і ў залежнасці ад працягласці знаходжання выхаванцаў, з сезоннасцю, рэкамендаванымі аб’ёмамі  страў, зацверджанымі ва ўстаноўленым парадку зборнікамі рэцэптур для выхаванцаў ранняга і дашкольнага ўзросту, дыетычнага харчавання і іншымі тэхналагічнымі нарматыўнымі прававымі актамі.

Культура здароўя і культура руху — два ўзаемазвязаныя кампаненты жыцця дзіцяці. Фізічныя практыкаванні, фізкультхвілінкі, пальчыкавыя гульні, глядзельная і дыхальная гімнастыкі, рухомыя і спартыўныя гульні і практыкаванні, штодзённая зарадка, танцы, гульні на свежым паветры з’яўляюцца абавязковымі ў любой установе дашкольнай адукацыі — усё гэта дазваляе дзіцяці адчуваць сваё цела і кіраваць ім. Да таго ж рух актывізуе апетыт, паляпшае абмен рэчываў і стрававальныя працэсы, трэніруе волю і характар.

Псіхафізічнае здароўе і эмацыянальны дабрабыт дзіцяці шмат у чым залежаць ад асяроддзя, у якім яно жыве і выхоўваецца. Таму педагогамі ажыццяўляецца асабова-арыентаваны падыход да кожнага выхаванца: пазітыўнае стаўленне, арганізацыя аздараўленчых і прафілактычных мерапрыемстваў адаптацыйнага перыяду, псіхолага-педагагічнае суправаджэнне ў перыяд прывыкання да ўмоў установы дашкольнай адукацыі, наведванне дзяцей на даму з мэтай вывучэння ўмоў жыцця і выхавання.

Адносіны ў сям’і таксама з’яўляюцца асновай псіхалагічнага стану дзіцяці: менавіта ад іх залежыць, наколькі яно ўпэўнена ў сваіх сілах, наколькі вясёлае і дапытлівае, адкрытае да зносін і гатовае да сапраўднай дружбы.

Ва ўстанове функцыянуюць санаторныя групы для аслабленых, часта і працягла хварэючых дзяцей. Іх суправаджэнне ажыццяўляецца медыцынскімі работнікамі, маецца належная база для выхавання і аздараўлення дзяцей з захворваннямі лёгкіх і верхніх дыхальных пуцей, частымі ВРВІ і іншымі захворваннямі.

Галоўнымі саюзнікамі ў нашай працы па фарміраванні звычкі да здаровага ладу жыцця ў дзяцей з’яўляюцца бацькі, якія пастаянна запрашаюцца і далучаюцца да актыўнага адпачынку дзяцей у садку: дзён здароўя, фізкультурных свят. Так, у мінулым навучальным годзе прайшоў шэраг мерапрыемстваў з сумесным удзелам дзяцей і іх бацькоў: “Вясёлыя гульні”, “Урокі бяспекі”, “Чырвоны, жоўты, зялёны”, “Аб фізкультуры не забывай — здаровым, дужым вырастай”, фізкультурныя святы “Кірмаш гульняў”, “Дзень абаронцы Айчыны”, “Восеньскае свята”, “Дзень Нептуна”, “Няхай радуюцца дзеці на ўсёй планеце” і іншыя.

Такім чынам, неабходна з малых гадоў далучаць дзяцей праз сямейнае і грамадскае выхаванне да здаровага ладу жыцця, фарміраваць у малога навыкі захавання асабістага здароўя і беражлівых адносін да здароўя навакольных.