У сталовую? З задавальненнем!

“Мясныя гнёзды”, біфштэкс “Смачны”, “Мітболы з сырам”, катлета “Папараць-кветка”. Гучыць нібыта прапановы рэстараннага меню, але менавіта такімі стравамі зараз харчуюцца школьнікі. Нядзіўна, што новаўвядзенні прыйшліся даспадобы хлопчыкам і дзяўчынкам.

Усё лепшае — дзецям! Гэты лозунг і сёння вельмі актуальны. Аднак адпавядаць яму з часам становіцца няпроста. Дваццаць першы век падобны на “рог багацця”, з якога кожны хутка прывыкае выбіраць штосьці сваё. Але не ўсё гэта карысна, асабліва калі гаворка ідзе пра харчаванне. Сучасныя школьнікі ўсё часцей не жадаюць есці прапанаваную ва ўстановах адукацыі ежу, гаворачы, што дома яны такія прадукты не спажываюць.

Пілотны праект, накіраваны на вывучэнне гастранамічных прыярытэтаў навучэнцаў і ўдасканаленне арганізацыі харчавання ва ўстановах агульнай сярэдняй адукацыі, пачаўся яшчэ ў снежні мінулага года (Пастанова Савета Міністраў Рэспублікі Беларусь ад 15 снежня 2022 г. № 870 “Аб эксперыменце па арганізацыі харчавання навучэнцаў”). Патрэба ў правядзенні такога эксперымента відавочная: неабходна пастаянна ўдасканальваць харчаванне, улічваць узроставыя пажаданні, змены ў дыеталогіі і медыцыне. Не сакрэт, што дзеці не заўсёды з радасцю ядзяць у школе рыбу і печань, але гэта неабходныя прадукты. Пры сучасных падыходах да прыгатавання страў нават нелюбімыя дзецьмі прадукты харчавання будуць ужывацца з задавальненнем.

У студзені ў нашым раёне, як і ў іншых рэгіёнах, праводзілася вывучэнне меркаванняў школьнікаў і іх законных прадстаўнікоў па арганізацыі харчавання. Падрабязнасці даведаліся ў галоўнага спецыяліста аддзела па адукацыі райвыканкама Вольгі Амелькінай:

— З пачатку красавіка ў двухтыднёвае прыкладнае меню для вучняў нашых школ і гімназіі ўведзена дзесяць новых страў, якія гатуюцца паводле тэхналагічных карт, распрацаваных з  улікам атрыманых падчас эксперымента даных. У асноўным новаўвядзенні закранулі мясныя і рыбныя стравы. Напрыклад, паменшылі колькасць печані, замяніўшы яе іншымі мяснымі прадуктамі. З новых смакот некаторыя ўжо палюбіліся дзецям, асабліва катлета “Папараць–кветка”. Да таго ж павялічылася разнастайнасть страў: рыба ў сыры смажаная, біфштэкс “Смачны”, зразы “Фанфікі”, “Мітболы з сырам”, каўбаскі “Рыбка залатая”, катлеты “Класныя” і іншыя.

Таксама ў школах і гімназіі чацвер стаў днём беларускай кухні. У гэты дзень на сталах дзяцей з’яўляюцца дранікі з мясам, смажаніна беларуская са свініны, біточкі па-беларуску і гэтак далей.

Новаўвядзенні закрануць і рацыён харчавання дзяцей у летніх аздараўленчых лагерах.

А ў наступным навучальным годзе паступовы пераход да пілотнага праекта працягнецца, двухтыднёвае прыкладнае меню будзе пашырана, укараняцца новыя падыходы да арганізацыі харчавання школьнікаў. Меркаваць пра ўсе плюсы і мінусы “смачнага” эксперымента пакуль рана. Аднак ужо зразумела, што мы кіруемся ў верным напрамку, каб забяспечыць навучэнцаў смачным і здаровым харчаваннем.

Увогуле сёлета ў сілкаванні падрастаючага пакалення ва ўстановах адукацыі адбываюцца цікавыя змены. На некаторых з іх раёнка спыняла ўвагу ў № 5 ад 20 студзеня ў артыкуле “Смачна і рацыянальна”. Будзем і далей сачыць за “смачнымі” ўдасканаленнямі.