Сёлета школьныя лінейкі прайшлі ў не зусім звыклым фармаце. Аднак першы званок прагучаў ва ўсіх установах сярэдняй адукацыі.

У першы клас Лапіцкай СШ прыйшло 19 хлопчыкаў і дзяўчынак. 10 вучняў выпускнога класа і настаўніца вывелі іх на першую школьную лінейку і пазнаёмілі з традыцыямі школы. Для пачаткоўцаў пакуль усё новае і незнаёмае, і толькі з цягам часу яны даведаюцца, што вучням тут ёсць чым ганарыцца. Аб гэтым сведчыла і выступленне дырэктара Мікалая Пісьмянкова, які адзначыў поспехі лепшых навучэнцаў:              11-класніцы Сафіі Чорнай, вучаніц 10 і 5 класаў Веранікі і Маргарыты Карманавых,    3-класніц Ульяны Янкоўскай і Лаліты Дрынь, 4-класніцы Юліі Васічавай. Пасведчанне стыпендыята спецыяльнага фонду Прэзідэнта Республікі Беларусь па падтрымцы адоранай моладзі атрымалі вучаніца выпускнога класа Ганна Марозава і былая выпускніца Анастасія Няверава.

Лапіцкая школа прыняла сваіх 192 вучняў у абноўленым выглядзе. За сродкі Міжнароднага банка рэканструкцыі і развіцця праведзены капітальны рамонт вентыляцыйнай сістэмы, сталовай і спартыўнай залы, чатырох про-фільных кабінетаў. Адрамантаваны санвузлы, калідор і фае, заменены аконныя блокі і свяцільні. Акрамя таго, за сродкі, атрыманыя ад пазабюджэтнай дзейнасці, набыты будматэрыялы для рамонту 16 кабінетаў. Работы праводзіліся сіламі педагогаў, тэхперсаналу, бацькоў і вучняў. Куплены два тэлевізары, камп’ютар, мэбля. Першакласнікам устанавілі новыя парты і шафкі для вопраткі. Шмат зроблена і па навядзенні парадку на прылеглай тэрыторыі.

Няхай жа рабяты з задавальненнем крочаць па шляху ведаў!

У Дзень ведаў вучняў спецшколы-інтэрната

для дзяцей з парушэннем функцый апорна-рухальнага апарату традыцыйна наведваюць шэфы — прадстаўнікі Дэпартамента аховы УУС.

Сёлета віншаваў хлопчыкаў і дзяўчынак з пачаткам вучэбнага года намеснік начальніка Дэпартамента аховы — начальнік упраўлення ідэалагічнай работы               і кадравага забеспячэння палкоўнік міліцыі Дзмітрый Дрозд, які пажадаў рабятам поспехаў у вучобе, выказаў словы ўдзячнасці калектыву вучэбнай установы і ўручыў яе дырэктару Ларысе Гормаш падарачны сертыфікат і Ганаровую грамату.

Свята працягнулася на вуліцы: там вучняў чакалі прадстаўнікі Магілёўскага аблупраўлення аховы са службовымі сабакамі. Міліцыянеры-кінолагі расказалі аб выхаванні аўчарак, якія прадэманстравалі цікавыя элементы дрэсіроўкі. Таксама дзеці змаглі прымераць сродкі індывідуальнай і актыўнай абароны і на некалькі хвілін адчуць сябе сапраўднымі супрацоўнікамі Дэпартамента.