Бывай, школа! Дзень добры, канікулы!

Якім павінен быць апошні вясновы дзень? Радасным, шчаслівым і запамінальным. Такой і выдалася мінулая субота амаль для трох соцень выпускнікоў нашых школ, іх бацькоў і настаўнікаў. Нават цёплы дожджык, — добрая прымета! — які суправаджаў урачыстыя лінейкі, не знівеліраваў важнасці моманту.

…Лапіцкая СШ. Тут развітальны званок прагучаў для 14 дзяўчат і юнакоў. Павіншаваць 11-класнікаў і астатніх вучняў з завяршэннем чарговага навучальнага года прыйшлі старшыні сельсавета і калгаса Аляксандр Гарадзілаў і Мікалай Аляшкевіч, галоўны спецыяліст аддзела адукацыі, спорту і турызму райвыканкама Міхаіл Грыгорчык, намеснік камандзіра вайсковай часці 64608 Сяргей Цвыр. Ну а першым выпускнікоў вітаў дырэктар школы Мікалай Пісьмянкоў, які пажадаў выхаванцам знайсці правільную дарогу ў жыцці — сваю, асаблівую. А таксама не баяцца марыць: задуманае абавязкова здзяйсняецца — трэба толькі верыць у сябе.

Якім увогуле быў год для самай вялікай сельскай школы раёна? Адназначна — паспяховым. Вучні добра сябе паказалі ў другім туры рэспубліканскай прадметнай алімпіяды, заваяваўшы  8 дыпломаў, быў і заахвочвальны водгук на вобласці. На другім месцы ўстанова адукацыі ў раённых спартакіядзе і конкурсе мастацкай самадзейнасці “Творчыя ўзлёты”. Упершыню тут прайшоў “Школьны млын” — маштабнае рознабаковае мерапрыемства ў падтрымку маладзёжных і дзіцячых ініцыятыў. Вучаніцай года стала 6-класніца Анастасія Няверава. Словам, аб цікавых падзеях можна расказаць шмат, але не менш плённым павінна быць і лета: на базе школы пройдуць тры лагерныя змены.

З прыемнай місіяй завітаў да мясцовых школьнікаў начальнік разлікова-касавага цэнтра № 13 у г. Асіповічы філіяла ААТ “Белаграпрамбанк” Уладзімір Янкоўскі: вось ужо трэці год запар банк разам з асацыяцыяй “Беларуская федэрацыя футбола” і Міністэрствам адукацыі праводзяць дабрачынную акцыю “Падары дзіцяці футбольны мяч”. Узгаданы спартыўны інвентар і атрымалі на лінейцы першакласнікі.

“Няхай заняткі спортам дапамогуць стаць здаровымі, моцнымі і вынослівымі”, — такім быў наказ. Дарэчы, падарункі былі дастаўлены не толькі лапіцкім хлопчыкам і дзяўчынкам, але і вучням першых класаў усіх сельскіх школ і вучэбна-педагагічных комплексаў Асіповіччыны.

Валянціна КОРБАЛЬ.