Напярэдадні Дня настаўніка актавая зала РДК прымала прадстаўнікоў усіх навучальных устаноў раёна на традыцыйным пасяджэнні клуба педагагічных сустрэч: маладых спецыялістаў, вопытных настаўнікаў, ветэранаў педагагічнай працы.

Напачатку да прысутных звярнуўся з віншаваннем і падзякай старшыня раённага Савета дэпутатаў Сяргей Сувееў. Ён адзначыў, што настаўнікі фарміруюць асобу, якая ў будучым павінна праявіць сябе, таму ў многім ад асабістых якасцей педагога залежыць лёс дзяцей і заўтрашні дзень роднай краіны.

За поспехі ў рабоце Сяргей Пятровіч узнагародзіў Ганаровай граматай райвыканкама настаўнікаў рускай мовы і літаратуры СШ № 3 Галіну Вайцюк, пачатковых класаў Жорнаўскай СШ імя М. Ф. Каралёва Святлану Пішчову, загадчыка дзіцячага сада          “Усмешка” рабочага пасёлка Татарка Інэсу Русаковіч. Граматы Міністэрства адукацыі атрымалі загадчык ясляў-сада № 2 “Рамонак” Марына Жукава і метадыст раённага вучэбна-метадычнага кабінета Вольга Кур’яновіч; настаўнік геаграфіі гімназіі Наталля Барысёнак (на фота) і яшчэ 9 педагогаў — Ганаровыя граматы галоўнага ўпраўлення па адукацыі аблвыканкама.

Начальнік аддзела па адукацыі райвыканкама Наталля Шаўчэнка павіншавала ўсіх з прафесійным святам і адзначыла Ганаровымі граматамі аддзела па адукацыі працу 13 чалавек, уладальнікамі Падзячных лістоў сталі 4 педагогі і прыёмныя бацькі Еўдакія Гапа і Марыя Сідаровіч.

Ганаровая грамата Магілёўскага абласнога камітэта Беларускага прафсаюза работнікаў адукацыі і навукі патрапіла ў рукі выхавацеля ясляў-сада № 12 “Усмешка” Людмілы Забенька, 8 педагогаў атрымалі Ганаровыя граматы Асіповіцкага райкама прафсаюза работнікаў адукацыі і навукі.

Шчырыя словы ўдзячнасці 4 кастрычніка гучалі ў адрас ветэранаў педагагічнай працы, якія заклалі ўстойлівы фундамент адукацыі, зрабілі многае для паспяховага развіцця нашага раёна і з’яўляюцца і цяпер узорам глыбокай адданасці свайму прызванню. Старшыня райарганізацыі Беларускага грамадскага аб’яднання ветэранаў Міхаіл Слесарэнка ўручыў граматы Таццяне Курчэўскай і Але Ліхачовай.

Асаблівасцю сёлетніх сустрэч стала прадстаўленне ўдзельнікаў раённага этапу абласнога конкурсу творчых работ педагогаў “Педагагічная пара”. Гэта Вадзім і Наталля Грэнь, Ігар і Алена Дубінчыкі, Антаніна і Мікалай Фраловы, Мікалай і Таццяна Пісьмянковы, Мікалай і Святлана Пішчовы.

Мерапрыемства стала запамінальным і для 12 маладых спецыялістаў. Іх не толькі выклікалі на сцэну, але і прадставілі відэаролікі, у якіх юнакі і дзяўчаты расказвалі пра сябе і першыя працоўныя дні. На прафесійныя здзяйсненні моладзь натхніла настаўнік англійскай мовы гімназіі, пераможца раённага этапу конкурсу маладых педагогаў “Прызванне” Марыя Пінчук.

Завяршылася пасяджэнне віншаваннямі ў адрас калектыву Ялізаўскай СШ, якая сёлета адзначае векавы юбілей.

Ганна САБЕЛА.