Пра арганізацыю груп прадоўжанага дня ў школах горада і раёна даведаліся ў аддзеле па адукацыі райвыканкама.

Пасля ўрокаў у рабят пачынаецца вольны час і некаторыя з іх застаюцца ў групах прадоўжанага дня. Такая форма занятасці дзетак мае свае плюсы: па-першае, за сваіх сыноў і дачок спакойныя бацькі; па-другое, гэта разнастайныя секцыі і гурткі, падрыхтоўка дамашніх заданняў, прагулкі на свежым паветры; а галоўнае — структураваная арганізацыя дзейнасці дзіцяці пасля ўрокаў.

У нашым раёне групы прадоўжанага дня дзейнічаюць ва ўсіх установах агульнай сярэдняй адукацыі. У залежнасці ад колькасці выхаванцаў яны сфарміраваны наступным чынам: у групе сабраны толькі аднакласнікі ці аб’яднаны навучэнцы блізкага ўзросту. Дзейнасць ГПД рэгламентуецца нарматыўнымі дакументамі з улікам мясцовых умоў. Так, групы прадоўжанага дня могуць быць адкрыты для вучняў ажно да дзявятага класа, але для гэтага неабходна, каб бацькі напісалі заявы і жадаючых набралася дастатковая колькасць. Да таго ж немалаважна і наяўнасць прыдатнай матэрыяльна-тэхнічнай базы (для першакласнікаў арганізаваны дзённы сон), а таксама даступнасць гарачага харчавання ў залежнасці ад  працягласці знаходжання дзяцей ва ўстанове адукацыі.

Як паказвае практыка, ГПД наведваюць пераважна вучні першых і другіх класаў. Аднак прадоўжанкі ў раёне сфарміраваны для школьнікаў з першага па сёмы клас уключна. Вучні сярэдняга звяна адукацыі карыстаюцца паслугамі прадоўжанкі выключна на сяле.

Найбольш дзяцей налічваецца ў групах гімназіі — 177 вучняў, а вось сярод раённых школ у лідарах Ялізава. Тут ГПД наведвае 91 дзіця. У групах школьнікі могуць праводзіць да шасці гадзін, але ёсць ГПД на скарочаным дні, што абумоўлена арганізацыяй падвозу на школьных аўтобусах у сельскіх установах адукацыі.

З пачатку навучальнага года было сфарміравана 47 ГПД, якія зараз наведвае 1 138 дзяцей. У гарадскіх школах, гімназіі, а таксама Ліпені і Ялізаве, акрамя настаўнікаў, у ГПД працуюць і выхавальнікі.