Кастрычнік пазалотай вітае педагогаў

“Настаўнік — прафесія ад Бога, усе астатнія прафесіі — вытворныя ад яе”, — кажуць у народзе. Пазаўчора ў краіне адзначалася прафесійнае свята людзей гэтай высакароднай прафесіі. Па традыцыі напярэдадні яго педагогі Асіповіччыны сабраліся ў раённым Цэнтры культуры. Тут былі і тыя, хто мае за плячыма 3-4 дзясяткі гадоў працоўнага стажу, і выпускнікі педагагічных ВНУ, для якіх гэты навучальны год стаў першым у прафесійным жыцці. Тых і другіх віталі калегі, выказваючы ветэранам даніну павагі, а моладзі — пажаданні творчых узлётаў і метадычных знаходак.

Павіншаваў настаўнікаў са святам і намеснік старшыні райвыканкама Аляксандр Шаўлюга. Які выказаў упэўненасць у тым, што ўстановы адукацыі раёна будуць працягваць радаваць сваімі дасягненнямі, а выпускнікі праявяць сябе ў розных галінах народнай гаспадаркі. Начальнік раённага аддзела адукацыі Наталля Шаўчэнка адзначыла важнасць і высакароднасць працы педагога, падзякавала калегам за адданасць выбранай справе і творчы падыход да яе.

Былі ўручаны Ганаровыя граматы раённага выканаўчага камітэта і райаддзела адукацыі настаўнікам і кіраўнікам устаноў адукацыі, выхавальнікам і педагогам устаноў дадатковай адукацыі. А яшчэ ўдзельнікі сустрэчы атрымалі асалоду ад канцэртнай праграмы, з якой выступілі калегі і тыя, дзеля каго і працуюць паважаныя работнікі галіны.