26 верасня ў вучэбна-педагагічным комплексе “Вязаўніцкі дзіцячы сад-базавая школа” адбыўся ўрачысты мітынг, прысвечаны адкрыццю мемарыяльнай дошкі і прысваенню ўстанове імя Героя Савецкага Саюза Яўгенія Міхайлавіча Стэльмаха — ураджэнца гэтых мясцін, ваеннага лётчыка, які мужна загінуў у 1951 годзе и пахаваны ў китайским горадзе Люйшунь.
У мерапрыемстве прынялі ўдзел старшыня Асіповіцкага райсавета дэпутатаў Аляксандр Пузік, старшыня Ліпенскага сельвыканкама Надзея Цяхнюк, начальнік аддзела адукацыі, спорта і турызму райвыканкама Наталля Шаўчэнка. У школу завіталі мясцовыя жыхары, яе былыя вучні, а таксама родная і стрыечная сёстры патрыёта Таццяна Шаўцова і Марыя Губ- ская. Таццяна Міхайлаўна разам са сваімі сябрамі, у тым ліку і старшынёй раённай арганізацыі грамадскага аб’яднання “Беларускі Саюз ветэранаў вайны ў Афганістане” Юрыем Корбанам, выступілі ініцыятарамі ўвекавечання памяці праслаўленага героя.
— Спадзяёмся, — адзначылі яны, — што светлая памяць пра Яўгенія Міхайлавіча, які, не шкадуючы свайго жыцця, абараняў інтарэсы радзімы і загінуў, выконваючы інтэрнацыянальны абавязак, надоўга застанецца ў кожнага ў сэрцы. Асабліва хочацца, каб пра яго подзвіг ведала падрастаючае пакаленне і вучылася ў яго мужнасці і патрыятызму.
…Палатно, пад якім была схавана мемарыяльная дошка, усталяваная на будынку школы, здымаецца. У хвіліне маўчання застылі ўсе прысутныя. Гучаць артылерыйскія залпы. На вачах у людзей слёзы.
Па мірным небе плывуць аблокі, лёгкі ветрык паціху калыша дрэвы ў школьным садзе. Пад яго павеў з вуснаў адной з цяперашніх вучаніц гучаць словы:
— Мы будзем першымі выпускнікамі школы імя Героя Савецкага Саюза Яўгенія Міхайлавіча Стэльмаха. Гэта не толькі пачэсна для нас, але і адказна. Пастараемся быць дастойнымі грамадзянамі нашай краіны.
А затым над вёскай паплыла многім знаёмая, да болю шчымлівая песня “Жураўлі” ў выкананні педагога Жанны Ліха-дзіеўскай: “Мне кажется порою, что солдаты, с кровавых не пришедшие полей, не в землю нашу полегли когда-то, а превратились в белых журавлей”…
І як быццам бы пачуўшы гэтыя пранікнёныя словы, над школай ўзвілася птушка — сімвал свабоды і міру. Міру, дзеля якога стаяў на варце і наш зямляк Яўгеній Стэльмах.
Ніна ВIКТОРЧЫК.