У панядзелак, 2 верасня, на вуліцах тут і там можна было сустрэць прыгожа апранутых дзяцей з кветкамі ў руках, якія па аднаму і невялічкімі групкамі накіроўваліся ў двары ўстаноў адукацыі Асіповіччыны, дзе ў гэты дзень ладзіліся святочныя лінейкі. Урачыстасць адбылася і ў прафесійна-тэхнічным каледжы.
Адметна, што навучэнцаў установы не толькі павіншавалі з пачаткам навучальнага года, а першакурснікаў — з новым этапам у жыцці. На ўрачыстасцях з удзелам намесніка старшыні райвыканкама, начальніка ўпраўлення сельскай гаспадаркі і харчавання Віктара Стурліса было адзначана, што хлопцы і дзяўчаты не толькі добра адпачылі ў летні час, але і старанна папрацавалі. На будаўніцтве малочнатаварных ферм і ў ДУКВП «Райсэрвіс» побач з бабруйскімі студэнтамі рабіў 351 навучэнец каледжа і школ раёна.
Падзякі РА ГА БРСМ за ўдзел у развіцці студэнцкага руху ў раёне атрымалі камандзіры студ-атрадаў Міхаіл Чэшка, Антон Баравік, Аляксандр Жук, Iрына Стэльмах, Міхаіл Кур’яновіч, Вольга Вознік; ад упраўлення райсельгасхарчу і каштоўныя падарункі ад РА РГА «Белая Русь» — дырэктары ўстаноў, якія сфарміравалі студатрады і дапамаглі арганізаваць быт і вольны час іх удзельнікаў.