Адукацыя

Адпачынак на хвалі творчасці і ведаў

Бягучы год для дадатковай адукацыі асаблівы: роўна сто гадоў таму адкрыўся першы гурток тэатральнай творчасці дзяцей

Сёння юныя землякі маюць магчымасць знайсці для сябе цікавы і карысны занятак у раённым цэнтры творчасці, дзе працуюць аб’яднанні па інтарэсах рознай накіраванасці: вакал, харэаграфія, дэкаратыўна-прыкладное, выяўленчае мастацтва, тэхнічная творчасць, краязнаўства, турызм, інтэлектуальныя гульні, экалогія і іншыя. Падчас вучэбнага года ў цэнтры займаюцца больш за 1 800 хлопчыкаў і дзяўчынак, а педкалектыў складаецца амаль з 70 чалавек. Выхаванцы рэгулярна паспяхова ўдзельнічаюць у розных конкурсах, і гэты год не выключэнне. Скарбонка цэнтра творчасці папоўнілася 41 дыпломам абласных, 10 рэспубліканскіх і 37 міжнародных конкурсаў. Але спіс пакуль не поўны, бо ўзнагароды працягваюць паступаць, і гэта падстава ганарыцца дасягненнем выхаванцаў.

Вядома, такія абставіны абавязваюць педагогаў цэнтра забяспечыць дзецям актыўны і займальны вольны час на канікулах. Каб хлопчыкі і дзяўчынкі цікава правялі лета, арганізавана работа аздараўленчых лагераў. Гэта кругласутачны турысцка-края-знаўчы неперасоўны палатачны лагер “Радзімічы”, кругласутачны турысцкі палатачны неперасоўны лагер “Азімут”, у якіх дзеці вывучаюць гісторыю малой Радзімы, знаёмяцца з прыродай, славутасцямі, традыцыямі і звычаямі роднага краю. На базе кругласутачнага аздараўленчага лагера “Крыніца” працуе добра вядомы адораным дзецям лагер “Інтэлектуал”. У ваенна-патрыятычным лагеры “Юнацтва” ёсць магчымасць набыць веды па пачатковай ваеннай і фізпадрыхтоўцы. А для тых, хто любіць мастацкую творчасць, — аздараўленчы лагер з дзённым знаходжаннем “Атлантыда”, які працуе ў дзве змены.

Пошук і спрабаванне новых форм занятасці рабят працягваецца. Так, мяркуючы, што дзецям падабаецца гульнявая пляцоўка “Летні калейдаскоп”, педагогі цэнтра арганізуюць развіваючыя гульні, конкурсы, працу творчай майстэрні па нанясенні аквагрыму і мехендзі. Першыя сустрэчы з юнымі асіпаўчанамі паказалі, што такая ідэя іх зацікавіла. Значыць, сяброў у цэнтра творчасці стане яшчэ больш.

Ліна Бахарава,

метадыст цэнтра творчасці дзяцей і моладзі.