Апытанне

Лаві момант, абітурыент!

(Працяг. Пачатак тэмы ў № 85 ад 30.10.2020 г.)

Выпускнікі гарадскіх і сельскіх школ раёна падзяліліся сваім вопытам падрыхтоўкі

да цэнтралізаванага тэсціравання

Барыс Барысаў (Каменічы).

Беларускую мову здаў на 74 балы, хімію — 81 бал і біялогію —87 балаў:

— Да ЦТ пачаў рыхтавацца толькі ў 11 класе. Па біялогіі і хіміі дапамагалі рэпетытары. А вось беларускай мовай займаўся ў асноўным самастойна. Паступіў на стаматалагічны факультэт БДМУ. Лічу, што для добрых вынікаў ЦТ трэба набрацца цярпення, сілы волі, а таксама верыць у сябе. Тэсціраванне — гэта ўвесь курс школьнай праграмы і нават крыху больш. Калі рыхтавацца за год, трэба засвоіць велізарны аб’ём інфармацыі. Неабходна правільна размяркоўваць свой час: школа, падрыхтоўка да ЦТ і адпачынак. Рэпетыцыйнае тэсціраванне і дыстанцыйнае рэпетыцыйнае тэсціраванне дапамагаюць праверыць веды. Менавіта на РТ разумееш, як будзеш дзейнічаць на ЦТ: як размеркаваць час і ў якой чарговасці выконваць заданні.

Хачу сказаць, што год праляцеў незаўважна. Было досыць няпроста і хвалююча, але дзякуючы намаганням, якія я прыклаў да падрыхтоўкі, ужо часткова быў гатовы да ўсёй складанасці навучання ў ВНУ.

Павел Татур (СШ № 3).

Рускую мову здаў на 100 балаў. Па англійскай набраў 98, па матэматыцы — 87:

— Максімальнага выніку па рускай мове дапамагла дасягнуць перамога ў рэспубліканскай алімпіядзе. Да матэматыкі і англійскай рыхтаваўся з дапамогай рэпетытараў. На мой погляд, неабходна мець тры складнікі для паспяховай здачы ЦТ: па-першае, дакладнае вызначэнне тых вучэбных прадметаў, якія будзеш здаваць, гэта значыць, не трэба “распыляцца”; па-другое, здольнасць самааддана працаваць на шляху да высокага выніку; па-трэцяе, асабістыя амбіцыі — у добрым сэнсе, — якія набліжаюць цябе да мэты і дапамагаюць дасягнуць поспехаў.

Раман Жарносенка (гімназія).

ЦТ здаваў у 2019 годзе. Зараз студэнт 2 курса стаматалагічнага факультэта БДМУ:

— Рыхтавацца да ЦТ пачаў у сярэдзіне 10-га класа. Менавіта тады звярнуўся за дапамогай да рэпетытара па хіміі. А ўжо з 11 класа займаўся з рэпетытарамі па рускай мове і біялогіі. У гэты перыяд стараўся выкарыстоўваць усе магчымасці, каб падняць узровень ведаў, таму дадаткова наведваў курсы па профільных прадметах на базе гімназіі. З канца 10 класа рэгулярна спрабаваў свае сілы на РТ, а таксама рашаў заданні ДРТ.

Каб паспяхова здаць ЦТ, трэба, у першую чаргу, набіць руку. Таму ў адпаведнасці з планам, які прапануе вам настаўнік або рэпетытар, неабходна самастойна вырашаць заданні ЦТ розных гадоў, каб ахапіць увесь спектр ведаў. Асаблівае месца ў падрыхтоўцы варта надаць ЦТ самых першых гадоў, бо яны былі самыя складаныя.

Заплануйце этапы падрыхтоўкі, каб усё паспець. Перад тэсціраваннем трэба паўтарыць увесь матэрыял, таму таксама раю старанна распланаваць і гэты перыяд. Вельмі важна непасрэдна на ЦТ добра размеркаваць час, каб не рабіць апошнія заданні спяшаючыся. Дзейнічаў па такім прынцыпе: калі па некаторых прычынах не быў упэўнены ў адказе, то адзначаў заданне і ішоў далей, каб зрабіць тое, што ведаю, а затым вяртаўся да праблемных пытанняў.

Псіхалагічна падрыхтавацца цяжэй за ўсё. Хваляванне — галоўны вораг абітурыента. Таму галоўнае памятаць, што ЦТ — гэта, па сутнасці, простая самастойная праца, а таксама верыць ва ўласныя сілы. Каб супакоіць нервы, заплюшчыце вочы і пажадайце сабе поспеху, падумайце пра што-небудзь прыемнае. А пасля тэсціравання можна папесціць сябе, каб зняць стрэс, напрыклад, з’есці любімую страву ці заняцца чым-небудзь цікавым.

Кацярына Астравух,

вучаніца 11 класа ДУА “Ліпенскі ВПК д/с-СШ”.